تعارف سورۃ الاعلی

اس سورۂ مبارکہ کا نام ’الاعلی‘ ہے۔ اس میں ایک رکوع، انیس آیتیں، بہتر کلمات اور دو سو اکانوے حروف ہیں۔

نزول

جمہور علماء کے نزدیک یہ سورہ مکہ مکرمہ میں نازل ہوئی۔ بعض نے اسے مدنی بھی کہا ہے، لیکن علامہ جلال الدین براء ابن عازب رضی اللہ عنہ ہیں، وہ فرماتے ہیں، نبی کریم صلی اللہ علیہ وآلہ وسلم کے صحابہ کرام میں سے سب سے پہلے ہجرت کر کے مصعب ابن عمیر رضی اللہ عنہ عنہ اور ابن ام مکتوم رضی اللہ عنہ مدینہ تشریف لائے اور ہمیں قرآن کریم کی تعلیم دینی شروع کی۔ ان کے بعد عمار، بلا ل اور سعد رضی اللہ عنہم یہاں پہنچے۔ پھر حضرت عمر ابن رضی اللہ عنہ اپنے بیس ساتھیوں کے ساتھ یہاں آئے۔ ان کے بعد رحمتِ دو عالم صلی اللہ علیہ وآلہ وسلم نے سرزمین یثرب کو اپنے قدوم سے سرفراز کیا میں نے اہل مدینہ کو جتنا اس دن شاداں وفرحان دیکھا ایس اکبھی نہیں دیکھا۔ یہاں تک کہ چھوٹے بچے اور بچیاں اور کہہ رہے تھے ’یہ اللہ کے رسول ہیں جو ہمارے ہاں تشریف لے آئے ہیں‘۔

مضامین

اس سورہ کا آغاز اس حکم سے ہورہا ہے کہ اپنے رب اعلی کی تسبیح بیان کرو۔ یعنی وہ ہر نقص ضعف اور ناتوانی سے پاک ہے۔ اس کی ذات قدرت وحکمت کا سرچشمہ ہے۔ آسمان۔ آفتاب وماہتاب، فضا کی پہنائیاں، پہاڑوں کی بلندیاں، سمندروں کی بےقراریاں اسی نے پیدا فرمائی ہیں۔ ان تمام چھوٹی بڑی چیزوں کی تخلیق بےہنگم اور بےجوٹ نہیں بلکہ ہر چیز کو اس نے ایک اندازے اور سلیقہ کے مطابق پیدا فرمایا ہے اور ہر چیز کو اپنے طبعی فرائض انجام دینے کے لیے ظاہر ی اور باطنی قوتیں اور ان قوتوں سے کام لینے کے لیے آلات وجوارح بھی مرحمت فرماتے ہیں۔ اس نے ہر چیز کی جسمانی خوراک کا بھی مناسب انتظام فرمایا ہے اور ان کی اخلاقی اور روحانی بالیدگی کے لیے یہ صحیفہ رشد وہدایت نازل کیا ہے اور اس کے ہر کلمہ کو آپ کی لوح قلب پر یوں ثبت کردیا ہے کہ اب اس کے بھولنے کا امکان تک بھی نہیں۔

اس کے بعد اپنے حبیب کو فرمایا کہ آپ کا کام نصیحت کرنا ہے جس کے دل میں حق پذیری کی صلاحیت ہوگی، وہ اسے بصد ذوق وشوق قبول کرلے گا۔ لیکن جو ازلی بدبخت ہے وہ اس سے دور بھاگے گا۔ اور اس نکار کی اسے جو سزا ملے گی بڑی المناک ہوگی آخری آیات میں سمجھا دیا کہ دارین کی کامیابی کا تاج فقط اس شخص کے سر کی زینت بنتا ہے جو فکری اور عملی گمراہیوں سے اپنا دامن بچا تاہے اور ذکر الٰہی میں شب وروز مصروف رہتا ہے۔ یہ ایک ابدی حقیقت ہے جسے قرآن کریم میں بھی بیان کردیا گیا ہے اور اس سے پہلے جو آسمانی صحیفے انبیائے سابقین پر نازل ہوئے ان میں بھی اس حقیقت کو بیان کردیا گیا تھا۔