تعارف سورۃ یونس

اس سورہ کو حضرت یونس علیہ السلام کے نام سے منسوب کیا گیا ہے کیونکہ اس کے ایک رکوع میں آپ کی قوم کی نجات کا ذکر ہوا ہے۔ یہ گیارہ رکوع پرمشتمل ہے اور اس کی آیات کی تعداد ایک سو نو، کلمات ایک ہزار آٹھ سو بتیس اور نو ہزار ننانوے حروف ہیں۔

زمانہ نزول

حضرت حسن، عکرمہ، عطا اور جابر جیسے آئمہ تفسیر کے نزدیک اس ساری سورہ کا نزول مکہ مکرمہ میں ہوا۔ حضرت ابن عباس رضی اللہ عنہما سے منقول ہے کہ یہ سورہ مکی ہے سوائے تین آیتوں کے کہ جن کا نزول مدینہ طیبہ میں ہوا (قرطبی) لیکن پہلا قول ارجح ہے۔

زمانہ نزول

اگرچہ اس کا سال نزول تو متعین نہیں ہوسکا لیکن مضامین میں غور کرنے سے نتیجہ نکالنا مشکل نہیں کہ یہ سورہ اس وقت نازل ہوئی جب حضور صلی اللہ تعالی علیہ وآلہ وسلم نے تبیغ کا حق ادا کر دیا۔ طرح طرح کے دلائل و بینات سے ان کے اعتراضات کا رد فرما دیا۔ لیکن وہ اپنی ضد اور ہٹ دھرمی کی روش سے باز نہ آئے اور ان کے معاندانہ رویے میں مزید تندی اور سختی پیدا ہوگئی۔ اس لیے اس سورہ میں ان قوموں کا ذکر بھی فرمایا گیا ہے جنہوں نے اپنے انبیاء کی دعوت کو ماننے سے جب انکار کردیا اور ان کی ہدایت کی توقع نہ رہی تو ان پر عذاب الہی آیا اور اس نے ختم کرکے رکھ دیا۔

یہ سورہ مکہ میں نازل ہوئی اس لیے کے مخاطب بھی وہی لوگ تھے۔ وہی ان کی بیماریاں تھیں، وہی ان کے شبہات تھے اور وہی ان کا رویہ تھا جن کا ذکر گزشتہ مکی سورتوں میں گزرچکا ہے۔ اس لیے اس سورہ میں بھی انہی لوگوں کی اصلاح کی مشفقانہ کو ششیں کی جا رہی ہیں اور بڑے پیار بھرے انداز سے ان کے اعتراضات کا جواب دیا جا رہا ہے۔

پہلا شبہ: ان کی سب سے مہلک بیماری جس میں وہ مبتلا تھے شرک کی بیماری تھی۔ انہیں یہ بات سمجھ ہی نہیں آتی کہ اس عالم ہست و بود کی تخلیق اور تدبیر سے ایک ذات عہدہ برآ ہوسکتی ہے۔ وہ تمام شلوؤنِ حیات کے لیے الگ الگ خداؤں کے قائل تھے۔ ان سے پوچھا جا رہا ہے کہ یہ بت جن کو تم نے خدا بنا رتھا ہے آخر ان کے خدا ہونے کی تمہارے پاس کوئی دلیل بھی ہے۔ بھلا یہ تباؤ اس عالم میں ان گنت چیزیں ہیں بڑی بھی اور چھوٹی بھی، گراں بھی ارزاں بھی، مفید بھی، مضربھی، خوبصورت بھی، بدصورت بھی! تم ہی کہو ان سے کوئی ایک چیز بھی ایسی ہے جس کو تمہارے ان خداؤں نے پیدا کیا ہو؟ چلو یہ نہ سہی ہم تم سے یہ پوچھتے ہیں کہ تمہاری بقاء اور سلامتی کے لیے سینکڑوں اشیاء موجود ہیں۔ پانی، ہوا، روشنی، اناج، پھل، کھانے اور سواری کے حیوانات تم یہ بتاؤ کیا ان میں سے بھی کوئی ایسی چیز ہے جس کو تمہارے ان دیوتاؤں نے پیدا کیا ہو؟ اگر یہ بھی ان کی تخلیق نہیں تو یہ کہو تمھیں جو دیکھنے کو آنکھیں، سننے کو کان، بولنے کو زبان، سمجھنے کو عقل اور دیگر کئی قوتیں دی گئی ہیں کیا ان میں بھی کوئی قدرت ان کی عطاء کردہ ہے؟ چلو اسے بھی رہنے دو تم اپنی زندگی عزت و آرام اور امن و عافیت سے بسر کرنے کے لیے کسی راہنما کی رہنمائی کے محتاج ہو جوا شیاء کے حسن و قبح سے تمھیں آگاہ کرے، تمھیں تمہارے نفع و نقصان سے خبردار کرے‘ تمہارے لیے ایسے قانون بنائے جو عدل و انصاف کے تقاضوں کو پورا کر سکیں‘ تمہارے ان گونگے اور بہرے خداؤں نے کبھی اس معاملہ میں بھی تمہاری راہنمائی کی ہے؟ اگر ان تمام سوالات کا جواب تمہارے نزدیک بھی نفی میں ہے تو عقل و خرد کے دعویدارو! پھر تم ان کی خدائی پر کیوں ایمان لاتے ہو؟ کتنا مؤثر اور دلنشیں انداز بیان ہے کہ دل کی گہرائیوں میں اترتا چلا جاتا ہے۔

اگر اب بھی اس کو نہیں پہچان سکے تو سچ بتاؤ کبھی تمھیں کسی بحری سفر پر جانے کا اتفاق ہوا، تمہاری کشتی سطح آب پر آہستہ آہستہ چلی جا رہی ہو، اچانک مطلع ابرآلود ہوجائے، بادل امڈ آئیں، تیزآندھی چلنے لگے، سمندر کی خونخوار موجیں منہ کھولے ہوئے تمہیں اور تمہاری کشتی کو نگلنے کے لیے باربار آگے بڑھ رہی ہوں‘ تمہارے بچ نکلنے کی ساری امیدیں ختم ہوچکی ہوں‘ تم نے اپنے ان معبودوں کو بار بار پکارا ہو اور کوئی بھی تمہاری خبر لینے نہ آیا ہو، جب ہر طرف موت دکھائی دینے لگی ہو‘ سچ بتاؤ کیا اس وقت کسی کا تمہیں خیال آیا تھا؟ کس کی چوکھٹ پر بیساختہ تمہاری جبینِ نیاز جھکی ہو تھی؟ ان کربناک لمحوں میں تم نے کس کے صدق و صفا کا پیمان باندھا تھا؟ پھر کسی کی رحمت نے آگے بڑھ کر تمہاری ڈوبتی ہوئی کشتی کو سہارا دے کر بچا لیا تھا؟ وہ کون تھا معلوم ہے تمھیں؟ وہی تمہارا خدا وند! وہی تمہارا معبود برحق تھا! جس کو مان کر پھر تم اس سے روگردانی کرنے لگے۔

دوسرا شبہ: تمھیں حیرت ہے کہ ایک بشر کو منصب رسالت پر کیوں فائز کیا گیا ہے۔ کیا تمہاری یہ خواہش ہے کہ تمھیں راہ راست دکھانے کے لئے تمھیں پیغامِ حق سنانے کے لیے کوئی جن یا کوئی فرشتہ بھیجا جاتا۔ جس کو نہ تم دیکھ سکتے اور نہ اس کی گفتگو کو سمجھ سکتے اور اگر وہ تمھیں اپنا آپ دکھاتا تو تم اس کی ہیبت و جلال سے اپنا ہوش و حواس کھو بیٹھتے اور لینے کے دینے پڑجاتے۔ تم ہی فیصلہ کرو کیا اس قسم کے نبی کی بعثت تمہارے لیے ہو موجبِ رحمت ہوتی یا باعث زحمت؟ اللہ تعالی کی حکمت اور رحمت کا تقاضا یہی ہے کہ تم میں سے کسی کو شرفِ نبوت سے مشرف کر کے مبعوث فرمائے تاکہ تم اس سے فیض حاصل کر سکو۔

تیسرا شبہ: انہیں قرآن کریم کے کلام الہی ہونے پربھی اعتراض تھا۔ وہ یہ سمجھتے تھے کہ یہ بھی کسی انسان کا بنایا ہوا کلام ہے ان کے اس شبہ کو دور کرنے کے لیے انہیں چلینج دیا گیا کہ تم ایسا کرو کہ سب مل بیٹھو۔ تمہارے ملک میں جتنے زبان آور شاعر، خوش الحان خطیب اور قادر الکلام ادیب ہیں‘ سب کو بلالو اور اپنی اجتماعی فصاحت و بلاغت کو بروئے کار لاتے ہوئے‘ زیادہ نہیں ایک چھوٹی سی سورہ ہی اس جیسی بنا دو۔ اس طرح خود بخود اسلام کا چراغ بجھ جائے گا اور تمہاری یہ بےچینی دور ہوجائے جس نے تمہارے دن کا چین اور رات کی نیند حرام کررکھی ہے۔ اگر تم سب مل کر بھی ایک چھوٹی سورہ نہیں بنا سکتے تو پھر بےجا ضد اچھی نہیں‘ مان لو کہ یہ اللہ تعالیٰ کا کلام ہے۔ یہ کتاب جو تمہارے لیے نازل کی گئی ہے جانتے ہوئے کہ یہ کن خیرات و برکات کی حامل ہے۔ آؤ سنو! یہ تمہارے رب کی طرف سے نصیحت ہے۔ اس میں تمہارے سنیوں کی ساری بیماریوں اور جملہ روگرں کے لیے نسخہ شفا ہے۔ جو اس کو دل وجان سے مان لیتے ہیں ان کے لیے یہ سراپاہدایت اور رحمت ہے۔

چوتھا شبہ: تمہیں اس پر بھی اعتراض ہے کہ میں مرنے کے بعد تمہیں ایک دوسری زندگی کی خبر دے رہا ہوں۔ تمہارے نزدیک یہ ناممکن اور خلاف عقل ہے اگر میں تم سے پوچھوں کہ کیوں توتم کیا جواب دو گے کیا خدائے قدیر نے عدم محض سے ہر چیز کو پیدا نہیں کیا گیا اس کے لیے یہ کوئی مشکل بات ہے کہ وہ موجودات کے منتشر زروں کو جوڑ دے۔

غرضیکہ مشرکین کے دل میں کھٹکنے والے جتنے شکوک و شہبات تھے ان کا حکیمانہ اور مشفقانہ جواب دیا تاکہ اگر کوئی پھر بھی حق کا انکار کرے تو اس کی مرضی اور اس کی قسمت‘ کم ازکم یہ تو کوئی نہ کہے کہ مجھے سمجھایا نہیں گیا تھا۔

آخر میں دو اہم چیزوں کو بیان فرما کر سورہ کو ختم کیا؛ اپنے برگزیدہ رسول اور محبوب بندے کو ارشاد فرمایا کہ دشمنوں کی غوغہ آرائیوں کی پرواہ نہ کرتے ہوئے اور ان کی ستم کیشیوں کو خاطر میں نہ لاتے ہوئے ہر طرف سے توجہ ہٹا کر آپ اس دین حق کی طرف اپنا رخ موڑ لیں اور اس کا دامن مضبوطی سے پکڑ لیں۔ نیز اس امر کی بھی وضاحت فرما دی کہ نفع و ضرر کا کلی اور حقیقی اختیار اللہ سلطانہ کے دستِ قدرت میں ہے وہ جس کو چاہے کسی مصیبت میں مبتلا کر دے اور جس کو چاہے اپنے انعامات اور احسانات سے مالا مال کردے۔ اس کے غضب سے کوئی چھوڑا نہیں سکتا اور اس کے دستِ جود اور فضل و عطاء کو کوئی روک نہیں سکتا۔ اگر اس نے یتیم مکہ کو ختم نبوت کے تاج سے سرفراز فرمایا ہے تو کسی کو کیا اعتراض؟ اگر اس نے اپنے حبییب اکرم صلی اللہ تعالی علیہ وآلہ وسلم کو رحمتہ للعالمین کی خلعت فاخرہ سے نوازا ہے تو کسی کے پیٹ میں بل کیوں پڑے؟ اس کی تو یہ شان ہے۔

ان اساسی مضامین کے علاوہ علم وحکمت کے کئی دمکتے ہوئے موتی ہیں جو اس سورہ کی روائے نور میں جڑے ہوئے ہیں۔ جب آپ اس کا مطالعہ کریں گے تو ان کا حسن لازوال خود بہی آپ کے دامن تو جہ کو اپنی طرف کھینچ لے گا۔