تعارف سورۃ المائدۃ

اس سورہ پاک کا نام المائدہ ہے اور یہ مدنی ہے۔ کیونکہ ہجرت کے بعد جو سورتیں نازل ہوئیں خواہ وہ مدینہ طیبہ میں نازل ہوئی ہوں یا مدینہ طیبہ سے باہر حالت سفر میں یا حج و عمرہ کے ایّام میں خاص مکہ مکرمہ میں سب کو مدنی کہا جاتا ہے۔ سورہ المائدہ کی ایک سو بیس آیات اور سولہ رکوع ہیں۔ اس کے حروف کی تعداد بارہ ہزار چار سو چونسٹھ ہے۔

زمانہ نزول

اس سورہ کی فقط ایک ’الیوم اکملت لکم الخ‘ کے متعلق تو یقین سے کہا جاسکتا ہے کہ وہ حجّۃ الوداع کے موقع پر میدان عرفات میں 9 ذی الحجہ سنہ 10 ہجری کو نازل ہوئی۔ باقی آیات کی تاریخ نزول کے متعلق و ثوق سے کچھ نہیں کہا جاسکتا۔ لیکن مختلف روایات میں غور و فکر کرنے سے یہ نتیجہ اخذ کرنا مشکل نہیں کہ اس کا نزول صلح حدیبیہ کے وقت سے شروع ہوا اور حجۃ الوداع کے موقعہ پر اس کا اختتام ہوا۔

یہ چند سال اسلامی تاریخ میں بڑی اہمیت رکھتے ہیں۔ مدینہ کے افق پر خطرات کے جو سیاہ بادل ہر وقت منڈلایا کرتے تھے وہ آہستہ آہستہ ناپید ہو رہے تھے۔ کفار پر یہ حقیقت عیاں ہو چکی تھی کہ اسلام ایک قوت ہے اس کو مٹانا اب ان کے بس کی بات نہیں۔ یہودیوں کا زور بھی اب ٹوٹ چکا تھا۔ مدینہ اور اس کے گرد و نواح میں ان کی سب بستیاں، گڑھیاں اور قلعے مسلمانوں کے تصرف میں تھے۔ غرضیکہ مظلومیت کی طویل اور تاریک رات اب ختم ہو رہی تھی اور آفتاب اقبال طلوع ہورہا تھا۔ ان بدلے ہوئے حالات میں یہ سورہ نازل ہوئی۔

مضامین

1۔ اخلاقی تربیت: اس سورہ کا آغازتربیت اخلاق سے ہو رہا ہے اس لیے پہلے اسی عنوان پر غور کریں۔ اس سورہ میں مختلف اقسام کے اخلاقی سبق دئیے گئے ہیں جن کا تعلق جس طرح ایک قوم کی انفرادی اور اجتماعی زندگی سے ہے اسی طرح ان کا تعلق بین الاقوامی معاملات اور تعلقات سے بھی ہے۔ سب سے پہلے یہ حکم دیا جا رہا ہے کہ جو وعدہ کرو اس کو پورا کرو۔ خواہ یہ وعدہ کاروبارکے متعلق ہو‘ اپنے حلیفوں سے ہو یا حریفوں سے ہو اور خواہ اپنے رب ذوالمجد و الاعلٰی سے ہو۔ آج کل کی متمدن قومیں‘ یہ درست ہے کہ اپنے انفرادی وعدوں کی کسی حدتک پابندی کرتی ہیں لیکن سیاسی زندگی میں اپنے وعدوں کی جو مٹی پلید کرتی ہیں وہ محتاج بیان نہیں۔ مسلمانوں کا رب انہیں حکم دیتا ہے کہ جو وعدہ کرو اسے پورا کرو خواہ وہ وعدہ حدیبیہ کے میدان میں دشمنان اسلام سے ہی کیوں نہ کیا گیا ہو۔

اب جب قوت و اقتدارمسلمانوں کے پاس آرہا ہے تو ان کو صاف صاف اور کئی کئی بارحکم دیا کہ جب قضاء کی کرسی پر بیٹھو تو یاد رہے کہ تمہارا دشمن ذاتی نہیں بلکہ دینی ہی کیوں نہ ہو‘ عدل و انصاف کا دامن تمہارے ہاتھوں سے چھوٹنے نہ پائے۔ نیز فرمایا کہ اقوام عالم سے تمہارے تعلقات کی بنیاد یہ ہو کہ نیکی اور بھلائی کے ہرکام میں انھیں تمہاری معاونت حاصل ہو اور گناہ اور ظلم کے کسی کام میں تم ان سے اشتراک نہ کرو۔ فرزندان آدم کا قصہ بیان کرکے بتایا کہ حسد بہت بری چیز ہے اس نے بھائی کو بھائی کا قاتل بنا دیا۔ اس مذموم خصلت سے احتراز کرنا۔

2۔ کتبِ سماوی: دوسری اہم چیز جس کا ذکر اس سورہ میں کیا گیا ہے وہ یہ ہے کہ تورات انجیل اور قرآن الگ الگ نظریات کے علم بردار نہیں بلکہ یہ تنیوں نہریں ایک ہی سر چشمہ فیض سے پھوٹی ہیں۔ تورات کے متعلق فرمایا کہ ’فیھا ھدی و نور‘ انجیل کے متعلق بھی بعینہ یہی الفاظ فرمائے کہ ’فیہ ھدی و نور‘ اور قرآن کے متعلق تو باربار یہی فرمایا گیا ہے۔ معلوم ہوا سب میں ہدایت ہے اور ہر ایک کتاب میں اپنے زمانہ کے مطابق شریعت کامکمل ترین نظام اور اخلاقیات و معاملات کا واضح ضابطہ موجود تھا۔ ان سب کا جامع اور ان تمام بلند اخلاقی قدروں کا نقیب محافظ اور نگہبان قرآن مجید ہے۔

3۔ حاملینِ قرآن کو دعوتِ فکر: حاملان قرآن کو تنبیہ فرمادی کہ دیکھو ہدایت و نور یہود کے پاس بھی ؤتھی، لیکن انھوں نے اس فائدہ نہ اٹھایا۔ اے غلامانِ مصطفے! اب وہی ہدایت و نور اپنی پوری آب و تاب اور شوکت و جلال سے تمہارے مطلع حیات پر نمودار ہو رہا ہے اور تمھیں اس سے استعفادہ کا موقع دیا جا رہا ہے۔ کہیں تم بھی اپنے پیش روؤں کی طرح اپنی خواہشات اور خودساختہ مصلحتوں کی قربان گاہ پر اسے بھینٹ نہ چڑھا دینا۔ اللہ تعالی کے نازل کردہ احکام کی پوری پوری تعمیل کرنا کیونکہ جو اللہ تعالی کے حکم کو چھوڑ کر اپنی خواہشات کے مطابق فیصلے کرتا ہے وہ منکر حق ہے۔ وہ تمہیں بھی جاوہ حق سے بہلانے پھسلانے کی انتہائی کوشش کریں گے۔ خبردار! ہوشیار! ان کے دام فریب میں نہ پھنس جانا۔

معلوم ہوتا ہے اہل حق کو حق سے برگشتہ کرنے کی جو کوشش اس وقت شروع ہوئی تھی وہ بدستور جاری ہے اور پہلے کی نسبت زیادہ تندی اور تیزی سے اسی تحریک کے پیدا کردہ وسوسے ہیں جن کی وجہ سے اسلامی مملکتوں کے سربراہ اسلامی قانون کو اپنانے سے ہر اساں ہیں۔ بات تو صرف اتنی ہے کہ جس طرح پوری یک جہتی کے ساتھ ایک بار اللہ اکبر کہ کر ہم نے ان فرنگی آقاؤں کی ظاہری غلامی کے زنجیر توڑا ہے‘ بس ایک باراور جی کڑا کر کے اللہ اکبر کہیں اور ذہنی غلامی کا طلسم بھی توڑ کر رکھ دیں۔ قوت یقین اور ذوقِ عمل کا ایک معجزہ چند سال ہوئے ہم نے اپنی آنکھوں سے دیکھا ہے اور اقوام عالم کو دکھایا ہے، فقط ایک اور معجزہ نمائی کی ضرورت ہے۔ وادئ ایمن سے تو اب بھی یہ آواز دمادم آرہی ہے ’لاتخف انک انت الاعلیٰ‘ اور ’الق مافی یمینک‘ کا حکم مل رہا ہے لیکن ہم ہیں کہ ساحرفرنگ کی شعبدہ بازیوں سے دم بخود ہوئے بیٹھے ہیں۔

’افحکم الجاھلیۃ یبغون‘ (کیا تم جاہلیت کے قانون پر عمل کرنا چاہتے ہو؟) کی توبیخ سے یہ بتایا کہ ا گر تمہاری غفلت کے باعث حق کا چراغ گل ہوگیا تو پھرجاہلیت کا اندھیرا چھا جائے گا اور جاہلیت خواہ اس کے چہرہ کو علم وفن کی مشاطگی نے کسی دلِ آرام کی طرح بہت ہی دلکش و دلفریب بنا دیا ہو۔ اس کی روح ظالم ہے اس کی فطرت بےرحم ہے‘ وہ تمہاری ساری عزیز قدروں اور عقائد کو کچل دے گی، روند ڈالے گی بلکہ خود تم سے روندوا ڈالے گی۔

4۔ قانونی احکام: قرآن جو شریعت لے کر آیا اس کی کئی جزئیات کا اس سورت میں ذکر کیا گیا ہے؛ حج کے آداب، شعائراللہ کی تعظیم، شراب و قمار کی قطعی ممانعت، وضو و تیمم کے احکام، حلال و حرام اشیا کا ذکر، پرامن راستوں پر ڈاکہ زنی کرنے والوں اور چوری کرنے والوں کے لیے عبر تناک سزائیں وغیرہ۔

5۔ عقیدہ تثلیث کا محاسبہ: ظہورِ اسلام کے وقت لات و ہبل کا زور ٹوٹ چکا تھا۔ ان کے اپنے ماننے والے ان سے بدظن ہو چکے تھے۔ اب صرف اتنی ہی دیر تھی کہ کوئی دھکا دے اور وہ دھڑام سے منہ کے بل گر پڑیں گے۔ لیکن شرک کی ایک اور قسم دنیا کے وسیع حصہ کو اپنی لپیٹ میں لیے ہوئے تھی یعنی عیسائیوں کا عقیدہ تثلیث۔ اس کی اشاعت کے لیے شاہی خزانوں کے منہ کھلے ہوئے تھے، اس کی حفاظت کے لیے بےشمار تلواریں بےنیام تھیں۔ جب کبھی کسی فکری بحران نے اسے دودِ چراغ محفل بنانا چاہا تو علماء فلسفہ یونان و روما کا حجابِ اکبر تان کر کھڑے ہو جاتے۔ قرآنِ مجید نے سورہ مائدہ میں اس عقیدہ کا بڑی بےتکلفی اور فطری سادگی سے تجزیہ کرتے ہوئے بتایا کہ عیسٰی (علیہ السلام) خدا نہیں ہوسکتے جوماں کے شکم سے پیدا ہو اور اپنی بقاء کے لیے کھانے پینے کا محتاج ہو وہ بندہ ہو سکتا ہے، مقبول ترین بندہ، محبوب ترین بندہ ہو سکتا ہے لیکن خدا نہیں ہو سکتا۔ روزقیامت پیش آنے والے واقعات کو بیان کرتے ہوئے حضرت مسیح کی زبانی توحید خالص کا اعلان کرا دیا۔

6۔ تکمیلِ دین کا اعلان: اس سورہ کا طرہ امتیاز وہ آیت کریمہ ہے جو بتاریخ 9 ذی الحجہ سن 10 ہجری میدانِ عرفات میں رحمت عالمیان‘ پیکرِہدایت‘ نورمجسم صلی اللہ تعالی علیہ وآلہ وسلم پر نازل ہوئی }الیوم اکملت لکم دینکم واتممت علیکم نعمتی اورضیت لکم الاسلام دینا{ دین کی تکمیل کا اعلان! اتمام نعمت کا مثردہ! اللہ اللہ! بلال کی آنکھیں خوشی کے آنسوؤں سے ڈبڈبا گئی ہوں گی۔ ابوبکر کی جبینِ نیاز سجدہ میں جھک گئی ہوگی، عمر و عثمان و علی رضوان اللہ علیہم کے چہرے فرطِ مسرت سے رشک مہ تاباں بن گئے ہوں گے اور حمزہ، یاسر، سمیہ اور خباب رضوان اللہ علیہم اپنے اپنے مزارات پرانوار میں ربِ ذوالجلال کی حمد و ثنا کوثر و سلسبیل سے دھلے ہوئے نورانی کلمات سے کرنے لگے ہوں۔ کائنات کا ذرہ ذرہ جھوم اٹھا ہو گا۔ اللہ رب السموات و الارض کی ساری نوری مخلوقات اس کے حبیب، اس کے رسول، اس کے صفی اور اس کے عبد محمد مصطفٰے صلی اللہ تعالیٰ علیہ وآلہ وسلم پر درود و سلام کے پھول نثار کر رہی ہوگی۔