تعارف سورۃ الملک

پہلی آیت میں "الملک" کا کلمہ ہے اسی کو اس کا عنوان مقرر کردیا گیا ہے اس کی 30 آیتیں ہیں۔ یہ تین سو تیس کلموں اور ایک ہزار تین سو تیرہ حروف پر مشتمل ہے۔

زمانہ نزول

اس کے مضامین سے پتہ چلتا ہے کہ عہد نبوت کے آغاز میں اس کا نزول ہوا۔ اس زمانہ میں نازل شدہ دوسری سورتوں کی طرح یہاں بھی انسان کو بار بار غور فکر کی دعوت دی گئی ہے۔ اس کے سامنے اللہ تعالیٰ کی توحید اور کبریائی کے تکوینی دلائل بڑے مؤثر انداز میں پیش کیے جارہے ہیں۔ متعد سوالات اٹھا کر ان کے جوابات کی ذمہ داری لوگوں کے فہم سلیم کے سپرد کردی گئی ہے۔ غور وتدبر کے نئے افق اس کے سامنے کشادہ کردیے گئے ہیں اور خداد قوتوں سے کام لینے کی دعوت دی گئی ہے۔

مضامین

اس سورہ کی ابتداء اللہ تعالیٰ کی عظمت وجلال کے ذکر سے کی جا رہی ہے اور اس کا ذکر خود زبان قدرت سے ہورہا ہے۔ حق تو یہ ہے کہ اسے ہی زیب دیتا ہے کہ اپنی حمد و ثنا کرے۔ یہ بتا کر کہ حیات و موت کا تسلسل اللہ تعالیٰ نے قائم کیا ہے فوراً انسان کی توجہ اس کی حکمت کی طرف موڑ دی کہ اس سے مقصد صرف تمہارا امتحان ہے کہ تم میں سے کون اپنی زندگی اچھے بلکہ اچھے سے اچھے کاموں کے لیے وقف کرتا ہے۔ اس کے بعد اپنی قدرت وحکمت کے ثبوت کے لیے اپنی کائنات کو پیش کیا اور دنیا بھر کے نقادوں کو بار بار دعوت دی کہ اس میں کوئی عیب تلاش کریں یا ا س سے بہتر کوئی اور نقشہ تجویز کر کے دکھائیں۔ جب کسی کو جرأت نہیں کہ اللہ تعالیٰ کی پیدا کی ہوئی کسی چیز پر انگشت نمائی کر سکے۔ اس سے بہتر تو کجا‘ اس کا متبادل بھی پیش کرنے سے ساری دنیا کے ماہرین عاجز ہیں۔ تو پھر نادان نہ بنو، اپنے سروں کو اس کے سامنے جھکا دو۔ اس کی وحدانیت اور اس کی تمام صفات کمال پر ایمان لے آو، ورنہ انجام بڑا اندوہناک ہوگا۔ ایسے دوزخ میں پھینک دیے جاؤ گے جس کے شعلے غیظ وغضب سے گرج رہے ہوں گے اس وقت تم اپنی غلطیوں کا اعتراف کرو گے، لیکن اس وقت اعتراف جرم کا تمہیں کوئی فائدہ نہ ہوگا۔

اسی ضمن میں بتادیا کہ سب انسان حق ناشناس نہیں کچھ وہ بھی ہیں جو اپنے رب کو بن دیکھے مانتے ہیں، اور اس کی ناراضگی سے ہر وقت لرزاں ترساں رہتے ہیں، ایسے لوگوں کے گناہ بھی بخش دیے جائیں گے اور انہیں اجر کبیر عطا فرمایا جائے گا۔ اس کے بعد اپنی قدرت کی کوئی اور نشانیوں کو ذکر کیا۔ پھر انہیں جھنجھوڑا کہ اگر تم نے انکار کی یہ روش نہ بدلی تو اللہ تعالیٰ کے لیے یہ کوئی مشکل نہیں کہ تمہیں زمین میں دھنسائے یا پتھر برسا کر تمہیں فنا کردے۔

حسب عادت بطور استہزاء انہوں نے وقوع قیامت کے بارے میں سوال کیا۔ اس کا جواب دیا کہ اس کا علم اللہ تعالیٰ کے پاس ہے۔ جب اس کا مقررہ وقت آجائے گا اور وہ برپا ہوگی تو ا س وقت تمہارے چہرے مسخ ہوجائیں گے۔

آخر میں ان سے ایک اہم سوال کر کے جس کا ان کی روز مرہ کی زندگی کے ساتھ بڑا گہرا تعلق ہے ان کے معبودوں کی بےبسی کو آشکارا کردیا تاکہ وہ غور کریں اور سمجھیں اور اپنے قادر مطلق پروردگار کی جناب پاک میں جبینِ نیاز جھکا دیں اور اس کے محبوب مکرم صلی اللہ علیہ وآلہ وسلم کے لائے ہوئے دین کو قوبل کر کے سعادت دارین کے مستحق ہوجائیں۔ درج ذیل احادیث میں اس سورہ کی قدر و منزلت بیان کی گئی ہے:

1. حضرت ابن عباس رضی اللہ عنہما سے مروی ہے:

قال ضرب بعض اصحاب النبی صلی الله علیه وآله وسلم خائه علی قبر وهو لا یحسب انه قبر فاذا قبر انسان یقأ سورة الملک حتی ختمها فاتی النبی صلی الله علیه وآله وسلم واخبروه فقال رسول الله علیه الصلوة والسلام هی المانعة هی المنجیة تنجیه من عذاب القبر. (اخرجه الترمذی وغیره)

نبی کریم صلی اللہ علیہ وآلہ وسلم کے ایک صحابی نے اپنا خیمہ ایک قبر پر نصب کیا، اسے یہ علم نہیں تھا کہ یہاں قبر ہے۔ پس اچانک انہوں نے سنا کہ کوئی آدمی سورہ ملک پڑھ رہا ہے یہاں تک کہ اس نے اس سورہ کو ختم کیا۔ وہ صحابی نبی کریم صلی اللہ علیہ وآلہ وسلم کی خدمت بابرکت میں حاضر ہوا اور سارا ماجرا عرض کیا۔ رسول اللہ علیہ الصلوۃ والسلام نے فرمایا کہ یہ سورہ اللہ تعالیٰ کے عذاب کو روکنے والی ہے۔ یہ سورہ اپنے قاری کو عذاب قبر سے نجات دلانے والی ہے۔

2. حضرت ابوہریرہ رضی اللہ عنہ راوی ہیں کہ حضور صلی اللہ علیہ وآلہ وسلم نے فرمایا کہ:

ان سورة من کاب الله ما هی الا ثلثون آیة شفعت لرجل حتی غفر له.

 تبارک الذی الخ اللہ تعالیٰ کی کتاب میں ایک سورہ ہے جس کی صرف تیس آیتیں ہیں۔ اس نے ایک ادمی کے لیے شفاعت کی یہاں آیتیں ہیں۔ اس نے ایک آدمی کے لیے شفاعت کی یہاں تک کہ اسے بخش دیا گیا۔ ( ابو داوءد، ترمذی وغیرہما)

3. حضرت عائشہ صدیقہ رضی اللہ عنہا سے منقول ہے:

ان النبی صلی الله علیه وآله وسلم کان یقرأ الم تنزیل السجده وتبارک الذی بیده الملک کل لیلة لا یدعهما (فی) فی سفر ولا حضرت.

حضور نبی کریم صلی اللہ علیہ وآلہ وسلم کا معمول تھا کہ ہر رات سفر و حضر میں سورہ سجدہ اور سورہ ملک پڑھا کرتے۔

4. حضرت ابن عباس رضی اللہ عنہ نے ایک شخص کو کہا کہ کیا میں تمہیں ایک ایسا تحفہ نہ دوں جس سے تم خوش ہو جاؤ۔ اس نے عرض کی بڑی مہربانی۔ آپ نے فرمایا:

اقرأ تبارک الذی بیده الملک وعلمها اهلک وجمیع ولدک وصبیان بیتک وجیرانک فانها المنجیه والمجادلة یوم القیامة عند ربها لقارئها.

سورہ ملک پڑھا کرو۔ اپنی بیوی کو بھی سکھاؤ اپنی ساری اولاد، اپنے گھر کے بچوں اور اپنے پڑوسیوں کو بھی سکھاؤ۔ کیونکہ یہ نجات دینے والی ہے۔ یہ قیامت کے دن اپنے رب کے حضور میں اپنے قاری کے لیے جھگڑا کرے گی اور اسے عذاب سے بچالے گی۔

5. حضور صلی اللہ علیہ وآلہ وسلم سے مروی ہے:

لودت انها فی قلب کل انسان من امتی.

میں اس بات کو بہت پسند کرتا ہوں کہ میری امت کے ہر مرد و زن کو یہ سورہ یاد ہو۔

اللہ تعالیٰ ہمیں اس کی تلاوت کی، اس کے معانی واثرات سے بہرہ ور ہونے کی توفیق ارزانی فرمائے۔ آمین