تعارف سورۃ الھمزہ

اس سورہ کا نام الھمزہ ہے جو اس کی پہلی آیت سے ماخوذ ہے یہ ایک رکوع اور نو آیات پر مشتمل ہے۔ اس کے تیس کلمات اور ایک سو تیس حروف ہیں۔

زمانہ نزول

علماء کا اس پر اتفاق ہے کہ یہ سورہ مکہ مکرمہ میں نازل ہوئی۔

مضامین

کفار مکہ یوں تو سب کے سب حضور سرور عالم صلی اللہ علیہ وآلہ وسلم سے بغض و عناد رکھتے تھے لیکن ان میں چند ایسے بدباطن بھی تھے جو جھوٹے الزامات لگاتے اور بہتان تراشی میں پیش پیش تھے۔ ان کی کفیت بھی یکسانیت نہیں تھی۔ کچھ ایسے تھے جو پسِ پشت تو غیبت و عیب جوئی میں کوئی کسر نہ اٹھا رکھتے لیکن روبرو کوئی ناروا بات کہنے کی وہ جسارت نہ کرتے۔ بعض بدبخت اور بےحیا ایسے بھی تھے جو منہ پر بھی طعن و تشنیع سے باز نہ آتے۔ اخنس بن شریق ان کا سرغنہ تھا۔ انہی لوگوں کے بارے میں یہ سورہ نازل ہوئی۔

بتایا جا رہا ہے کہ چاند کی چاندنی سے روشن تر، قطرہ ہائے شبنم سے پاکیزہ تر، گلاب کی پتی سے بھی زیادہ لطیف سیرت طیبہ پر جو لوگ نازیبا الزام لگاتے ہیں ان کا اپنا کردار کیا ہے؟ ان کے دلوں میں دولت کی محبت رچی بسی ہوئی ہے۔ مال جمع کرنا ان کا محبوب مشغلہ ہے۔ دراہم و دنانیر کو گننا اور بار بار گننا ان کی مرغوب تفریح ہے۔ خود تو مکھی کی طرح دنیا کی غلاظتوں پر بھنبھنا رہے ہیں اور بےادبیاں کرتے ہیں اللہ تعالیٰ کے اس محبوب کی ذات اطہر پر‘ جس کی ضیاء پاشیوں سے ایک عالم منور ہے۔

وہ صرف دولت کے پجاری اور پرلے درجے کے کنجوس ہی نہیں بلکہ عقل و فہم سے بھی بےبہر ہیں۔ وہ سمجھتے ہیں کہ دولت کی فراوانی انہیں موت کے چنگل سے چھڑا لے گی۔ کوئی بیماری ان کے قریب نہیں آئے گی۔ وہ ہمیشہ ہمیشہ زندہ رہیں گے۔ حالانکہ اگر ایسا ہوتا تو ان سے پہلے جو ان سے بھی کئی گنا زیادہ دولتمند لوگ تھے، وہ خاک میں مل کر خاک نہ ہوچکے ہوتے۔ کیا یہ لوگ آج ان کا کوئی نام و نشان دیکھا سکتے ہیں، ایسے ناعاقبت اندیش لوگوں کے انجام کے بارے میں بھی وضاحت فرمادی تاکہ کوئی شخص کسی غلط فہمی میں مبتلا نہ رہے۔ جس شخص کی تمنا ہے کہ وہ ایسے المناک انجام سے دوچار نہ ہو تو اسے چاہیے کہ وہ آج ہی سلامتی اور ہدایت کی راہ پر گامزن ہوجائے۔