تعارف سورۃ الانشقاق

اس سورہ کا نام ’الانشقاق‘ ہے جو ’انشقت‘ کا مصدر ہے۔ اس میں ایک رکوع، پچیس آیتیں، ایک سو سات کلمات، چار سو تیس حروف ہیں۔

نزول

یہ مکہ مکرمہ میں نازل ہوئی۔

مضامین

ابتدائی آیات میں ان ہولناک حادثات کا تذکرہ ہے جو وقوع قیامت کے وقت رونما ہوں گے۔ اس کے انسان کو بتایا جارہا ہے کہ اسے چار وناچار ہر حالت میں اپنے رب کے حضور میں پیش کیا جائے گا۔ اس روز تمام اولاد آدم دو گروہوں میں بٹی ہوئی ہوگی۔ ایک گروہ وہ ہوگا جن کو ازراہ بشارت ان کا صحیفۂ عمل ان کے دائیں ہاتھ میں پکڑایا جائے گا۔ اس وقت ان کی خوشی کی انتہا نہ ہوگی۔ دوسرا وہ گروہ جن کو ان کا نامۂ عمل پس پشت دیا جائے گا۔ ان کی خستہ حالی اور رنج واندوہ کا اندازہ لگانان ناممکن ہے۔ اس لیے ہر شخص کو آج یہ فیصلہ کرنا ہے کہ وہ کس زمرہ کے ساتھ اپنا حشر چاہتا ہے۔ یہ فیصلہ کرتے ہوئے اسے بار بار غور وفکر کرنا چاہیے کیونکہ جو فیصلہ سوچ سمجھ کر اپنے اختیار سے اپنے بارے میں تم کرو گے روز حشر اسی کے مطابق تمہارے ساتھ برتاؤ کیا جائے گا۔

آخر میں کئی قسمیں کھانے کے بعد انہیں بتایا جارہا ہے کہ انہیں ان مرحلوں سے یکے بعد دیگرے ضرور گزرنا ہوگا حیرت ہے ان لوگوں پر جو یہ جاننے کے بعد ایمان نہیں لا رہے۔ اور جب قرآن کریم کی تلاوت کی جاتی ہے تو وہ سر نیاز خدا کی بارگاہ جلال میں جھکا نہیں دیتے۔ ان کا انجام بڑا دردناک ہوگا۔ روز محشر فقط اہل ایمان ہی ایسے اجر سے نوازے جائیں گے جس کی کوئی انتہا نہ ہوگی۔