تعارف سورۃ الکوثر

اس سورہ طیبہ کا نام الکوثر ہے، جو اس کی پہلی آیت میں مذکور ہے۔ یہ ایک رکوع اور تین آیات پر مشتمل ہے۔ اسکے دس کلمات اور چالیس حروف ہیں۔

نزول

علامہ جلال الدین سیوطی نے اس سورہ کے نزول کے بارے میں دو قول لکھے ہیں: ایک حضرت انس رضی اللہ عنہ کا قول ہے وہ کہتے ہیں کہ اس سورہ کا نزول مدینہ طیبہ میں ہوا اور ان کی روایت کا مفہوم یہ ہے کہ ہم حضور کی خدمت میں حاضر تھے اچانک نزول وحی کی کیفیت طاری ہوگئی۔ حضور کا سر مبارک جھک گیا۔ تھوڑی دیر کے بعد تبسم فرماتے ہوئے اپنے سر کو اٹھایا۔ لوگوں نے تبسم کی وجہ پوچھی تو ارشاد فرمایا: اللہ تعالیٰ نے ابھی مجھ پر یہ سورہ نازل فرمائی ہے۔ پھر الکوثر کی تلاوت کی۔ لیکن ابن مردویہ نے حضرت ابن عباس، حضرت عبداللہ بن زبیر، ام المومنین عائشہ صدیقہ کا یہ قول نقل کیا ہے کہ یہ سورہ مکہ مکرمہ نازل ہوئی۔ ان اکابر صحابہ کے قول کو بہرحال حضرت انس رضی اللہ عنہ کے قول پر ترجیح دی جائے گی اور ان کی اس روایت کی توجیہ یوں بیان کی جاسکتی ہے کہ کئی سورتیں ایسی ہیں جن کا نزول متعدد بار ہوا۔ ہو سکتا ہے یہ سورہ اس محفل میں کسی خاص حکمت کے پیش ِ نظر دوسری بار نازل کی گئی ہو۔ اس کی تائید حضرت انس رضی اللہ عنہ کی دوسری روایت سے ہوتی ہے جسے امام مسلم اور ترمذی ودیگر محدثین نے روایت کیا ہے۔

حضور نے ارشاد فرمایا کہ شب معراج جب جنت میں داخل ہوا تو میں نے وہاں ایک نہر دیکھی۔ اس کے دونوں کناروں پر موتیوں کے خیمے نصب تھے میں جب اس کے پانی میں ہاتھ مارا تو اس سے خالص کستوری کی مہک اٹھنے لگی۔ اس کے بارے میں جبرئیل سے پوچھا تو انہوں نے جواب دیا:

هٰذا الکوثر الذی اعطاک الله.

یہ نہر کوثر ہے جو اللہ تعالیٰ نے آپ کو عطا فرمائی ہے۔

معراج تو مکہ میں ہوئی، اسی رات کو الکوثر کے عطا فرمائے جانے کا مژدہ ملا۔ اس لیے اس کی اطلاع بھی مکہ میں ہی دی گئی ہوگی۔ چنانچہ سیوطی لکھتے ہیں:

المشهور بین اهل التفاسیر و المغازی ان هٰذہ السورة مکیة.

یعنی علماء تفسیر اور مغازی کے نزدیک یہی بات زیادہ مشہور ہے کہ یہ سورہ مکی ہے اس کا انداز بیان بھی مکی سورتوں سے زیادہ مشابہت رکھتا ہے۔

شان نزول

ام المومنین حضرت خدیجۃ الکبری رضی اللہ عنہ کے بطن مبارک سے حضور پرنور صلی اللہ علیہ وآلہ وسلم کی چار صاحبزادیاں اور دو صاحبزادے تولد ہوئے۔ ایک صاحبزادے کا نام نامی قاسم اور دوسرے کا اسم گرامی عبداللہ تھا۔ ان کا لقب طیب اور طاہر بھی ہے۔ اعلان نبوت سے پہلے یہاں کے باشندے حضور کا بڑا احترام کرتے تھے۔ انہوں نے آپ کی ذات سے بڑی جسین توقعات وابستہ کر رکھی تھیں۔ آپ کی سیرت وکردار سے وہ اتنے متاثر تھے کہ آپ کو صادق اور امین کہہ کر پکارا کرتے تھے۔

حضور صلی اللہ علیہ وآلہ وسلم نے صفا کی چوٹی پر کھڑے ہو کر جب ’قولوا لا اله الا الله تفلحوا‘ کی دعوت دی تو اہل مکہ کے تیور بدل گئے۔ دلوں میں نفرت، حقارت اور عداوت کے جذبات امڈ آئے۔ انہیں حضور کی ہر بات سے چڑ ہوگئی۔ ہر وہ حادثہ جس سے نبی کریم کے خاطر عاطر کو دکھ پہنچتا ان کے لیے وہ مسرت و شادمانی کا باعث بنتا، چنانچہ جب دونوں صاحبزادے یکے بعد دیگرے کمسنی میں وفات پا گئے تو ان جانکاہ حادثوں پر اہل مکہ کو ذرا رنج نہ ہوا بلکہ انہوں نے اطمینان کا سانس لیا اور خوشی کے شادیانی بجائے۔ ان کے اعتقادات‘ ان کے رسم و رواج اور ان کے تمدن و معاشرہ کو اسلام سے جو سنگین خطرہ محسوس ہورہا تھا اس کی شدت میں کمی آگئی۔ انہوں نے یہ کہہ کر اپنے آپ کو بہلانا شروع کردیا کہ جب ان کی شمع زیست بجھے گی تو ان کا یہ لایا ہوا دین بھی دم توڑ دے گا۔ لڑکا تو کوئی ہے نہیں جو اس سلسلہ کو جاری رکھ سکے۔

ابتر اس شخص کو کہا جاتا ہے جس کا کوئی فرزند نہ ہو۔ قریش کے گستاخ یہی لفظ اللہ تعالیٰ کے محبوب کے حق میں استعمال کرنے لگے تھے۔ ابولہب حقیقی چچا تھا لیکن بغض و عناد کی یہ حالت تھی کہ جب حضور کے دوسرے صاحبزادے کا انتقال ہوا تو اس کی خوشی کی حد نہ رہی۔ دوڑا ہوا مشرکین کے پاس گیا اور ان کو یہ مژدۂ جانفزا سنایا’بتر محمد اللیلة‘ یعنی آج رات محمد کی نسل منقطع ہوگئی ہے۔ عاص بن وائل بھی کہا کرتا:

ان محمد ابتر لا ابن له یقوم مقامه بعده فاذا مات انقطع ذکره واسترحته منه.

محمد (علیہ الصلوۃ والسلام) ابتر ہیں، ان کا کوئی بیٹا نہیں جو ان کی وفات کے بعد انکا جانشین بنے۔ جب یہ فوت ہو جائیں گے، ان کا ذکر مٹ جائے گا اور اس وقت تمہیں راحت وآرام کا سانس لینا نصیب ہوگا۔

اس قسم کی دلآزاریاں جب تہذیب و شائستگی کی ساری حدود کو توڑ گئیں، ان کے طعن وتشنیع کے تیروں سے صبر کا دامن تار تار ہونے لگا۔ اس وقت اللہ کریم نے اپنے محبوب بندے اور برگزیدہ رسول پر یہ سورۂ مبارکہ نازل فرمائی جس میں انتہائی مختصر اور ازحد مؤثر انداز میں ان بےحد و بےحساب خیرات و برکات کا مژدہ سنایا گیا جن کا اللہ تعالیٰ نے اپنے حبیب کو مالک بنادیا تھا‘ بتادیا کہ تم یہ سمجھتے ہو کہ میرے محبوب کا ذکر مٹ جائے گا۔ ان کا کوئی نام و نشان باقی نہیں رہے گا۔ سن لو! یہ سراسر غلط ہے۔ میرے پیارے رسول کا چشمۂ فیض تا ابد جاری رہے گا۔ دنیا اس سے ہمیش ہمیشہ سیراب ہوتی رہے گی۔ اہل دل اس کی بارگاہ جمال میں اپنے عقیدت ومحبت کے رنگین پھول پیش کرتے رہیں گے۔

ارباب ذوق و شوق بزم عالم کو اس کے ذکر خیر سے آباد رکھیں گے۔ درود و سلام کی روح پرور صدائیں ہر لحظہ گلشن ہستی کے لیے مژدۂ بہار سناتی رہیں گی جب تک میری کبریائی کا پرچم فرش وعرش پر لہرا رہا ہے اس وقت تک میرے پیارے رسول کا ذکر ہوتا رہے گا۔ یہ شمع جس کو میں نے خود روشن کیا ہے۔ تند وتیز طوفانوں کے باوجود ہمیشہ نور افشاں رہے گی۔

فنا تو وہ ہوگا، نام ونشان تو اس کا مٹے گا، جڑ تو اس کی کٹے گی جس کے دل میں میرے نبی کریم کی عداوت ہوگی۔ اسلام کی چودہ صد سالہ تاریخ اس ارشاد خداوندی کی تصدیق و توثیق کر رہی ہے اور ہمیشہ ہمیشہ ایسا ہی ہوتا رہے گا بلکہ ان لوگوں نے خود دیکھا کہ چند سال بعد وہ دل و جان سے اس کے خادم اور پیروکار بن گئے تھے۔ وہ ذات اقدس و اطہر جس نے ایک تاریک شب میں مکہ سے بڑی بےسر و سامانی کی حالت میں ہجرت کی تھی۔ جس کا رفیق سفر صدیق اکبر رضی اللہ عنہ کے بغیر اور کوئی نہ تھا۔ چند سال بعد وہ دس ہزار کا لشکر لے کر مکہ کی سمت بڑھا تو مکہ نے اپنے بند دروازے اس کے استقبال کے لیے کھول دیے اور قریش سارے سردار گردنیں جھکائے ہوئے اس کی بارگاہ اقدس میں حاضر ہوگئے۔

ایک نکتہ اور یاد رکھنے کے قابل ہے۔ قرآن کریم میں جس جس موقع پر حضور رحمت للعالمین کی شان رفیع کا بیان ہوا ہے ان تمام آیات میں ایک بات قدر مشترک ہے وہ یہ کہ پہلے اللہ تعالیٰ نے اپنا ذکر کیا ہے اور اس کے بعد اپنے حبیب کی شان بتائی ہے۔ مثلاً ’سبحان الذی اسری بعبده لیلاً‘ اور ’ارسلناک الا رحمة للعالمین‘ اسی طرح یہاں بھی انا اعطینک الکوثر اس کی حکمت کیا ہے؟ جہاں تک اس ناقص کی فہم نارسا کی رسائی ہے مجھے تو اس میں دو حکمتیں جلوہ کنا نظر آتی ہیں۔ ایک تو یہ کہ لوگ حضور کے بےاندازہ کمالات کو دیکھ کر حضور کو خدا نہ سمجھنے لگیں۔ بتادیا کہ یہ کمالات ان کے ذاتی نہیں، بلکہ میں جو رب السموات والارض ہوں، نے انہیں ارزانی فرمائے ہیں۔ دوسری حکمت یہ ہے کہ کوئی کم نظر حضور کے کمالات کا انکار نہ کر سکے کیونکہ یہ سب کمالات خود اللہ تعالیٰ نے عطا فرمائے ہیں جو علیم بھی ہے، حکیم بھی ہے اور قدیر بھی ہے جو کمالات رسالت کا انکار کرتا ہے وہ درحقیقت اللہ تعالیٰ کی قدرت و حکمت اور اس کی صفت جود و عطا کا انکار کرتا ہے۔