تعارف سورۃ المدثر

اس سورۂ مبارکہ کا نام المدثر ہے۔ اس میں دو رکوع، چھپن آیتیں، دو سو پچپن کلمات اور ایک ہزار دس حروف ہیں۔

نزول

علماء کا اس پر اتفاق ہے کہ یہ سورہ مکہ مکرمہ میں نازل ہوئی۔ لیکن ساری سورہ بیک وقت نازل نہیں ہوئی بلکہ مختلف اوقات میں ان کے مناسب حال آیتیں نازل ہوئی۔

مضامین

پہلی سات آیتوں کے بارے میں بعض حضرات نے یہ بھی کہا ہے کہ نزول وحی کا آغاز ان آیات سے ہوا۔ لیکن محققین کے نزدیک یہی بات مسلم ہے کہ سب سے پہلے سورۂ اقرأ کی ایتیں نازل ہوئی۔ اس کے بعد کچھ عرصہ کے لیے نزول وحی کا سلسلہ منقطع رہا۔ یہ دن حضور کے لیے بڑے کرب واضطراب کے دن تھے۔ طبیعت ہر وقت بےچین رہتی ایک روز حضور غار حرا میں حسب معمول عبادت سے فارغ ہو کر گھر واپس تشریف لے جارہے تھے کہ اچانک افق آسمان پر آپ کو وہی فرشتہ کرسی پر بیٹھا ہوا نظر آیا جو پہلی وحی لے کر آیا تھا۔ اس منظر کو دیکھ کر طبیعت میں ہراس پیدا ہوا۔ گھر پہنچے فرمایا: ’دثرونی، دثرونی‘ (مجھے لحاف اڑھاؤ، مجھے لحاف اڑھاؤ) حضور لحاف اوڑھ کر لیٹ گئے۔ اسی حالت میں یہ آایت نازل ہوئیں جن میں فرائض نبوت کی ادائیگی کی طرف توجہ دلائی گئی ہے۔ پہلی وحی سے صرف یہ بتانا مقصود تھا کہ آپ کو منصب نبوت پر فائز کردیا گیا اور اس وحی سے فرائضِ نبوت سے آگاہ کیا اور ان کی ادائیگی کے لیے کمر بستہ ہونے کی تلقین فرمائی۔

آیت گیارہ تا چھبیس میں ایک خاص واقعہ کی طرف اشارہ کیا گہا ہے۔ اس کی تفصیل آیات کی تشریح کے ضمن میں آپ ملاحظہ فرمائیں۔ ان آیات میں ولید ابن مغیرہ کا نام لیے بغیر اس کے اطوارِ بد کا ذکر کردیا گیا کہ اس کا دل تو حضور کو سچا رسول اور قرآن کریم کو کلام الٰہی مانتا ہے لیکن اپنی قوم کی ناراضگی کے خوف سے وہ اس کا برملا اظہار نہیں کرتا اور اپنی سردار کو برقرار رکھنے کے لیے وہ حضور پر افتراء بازی سے باز نہیں آتا۔ یہ حضور کو ساحر اور آیات قرآنی کو سحر کہتا ہے۔ اس کو بتادیا کہ اسے دوزخ کی آگ کا ایندھن بنایا جائے گا۔ اس کے شعلے اس کو بھون کر رکھ دیں گے، نہ وہ زندوں میں شمار ہوگا نہ مردوں میں۔

آیت 27 سے رکوع کے اختتام تک دوزخ کے بعض حالت پر روشنی ڈالی۔ دوسرے رکوع میں بھی دوزخ اور دوزخیوں کے حالات کا تذکرہ ہے۔ آپ کی خصوصی توجہ کے لائق وہ سوال وجواہب ہے جو اہل دوزخ اور اہل جنت کے درمیان ہوگا۔ جنتی ان سے پوچھیں گے کہ تمہیں کیوں جہنم میں گھسیٹ دی ا گیا۔ وہ جواب دیں گے ہمارے جرائم میں سے دو بڑے جرم یہ تھے کہ ہم نماز نہیں پڑھا کرتے تھے اور ہم غریبوں کو کھانا نہیں کھلایا کرتے تھے۔ غور فرمائیے قرآن کریم غریب اور حاجتمند طبقہ کی مادی ضرورتوں کی فراہمی کو اسلامی معاشرہ اور اس کے خوشحال افراد کی کتنی بڑی ذمہ داری خیال کرتا ہے۔ جو شخص اس ذمہ داری کی ادائیگی میں کوتاہی کرتا ہے اس کا جرم اتنا ہی سنگین ہے جتنا اس شخص کا جو اپنے رب قدوس کو سجدہ نہیں کرتا جس دین میں غریب پروری کو اتنا اہم مقام دیا گیا ہو اس کے نام لیواؤں کو اپنے معاشرہ سے غربت وافلاس کی بیخ کنی کے لیے مارکس اور لینن کے اشتراکی فلسفہ کی قطعاً ضرورت نہیں، اگر ضرورت ہے تو فقط اس بات کی کہ ہم آیات قرآنی کی سرسری تلاوت نہ کیا کریں بلکہ اس کی گہرائیوں میں اتریں۔ اس کے تقاضوں کو سمجھیں اور پھر ان تقاضوں کو پورا کرنے کے لیے اپنے سارے وسائل کام میں لے آئیں۔

آیت 49 سے کفار کے خبث طبع کا ذکر فرما دیا کہ اگر انہیں اللہ کا کلام سنایا جاتا ہے تو وہ اس سے یوں بدکتے ہیں اور ڈر کر یوں دور بھاگتے ہیں جیسے جنگلی گدھے شیر سے ڈر کر بھاگتے ہوں۔ حالانکہ یہ کتاب سراپا نصیحت ہے۔ اس میں ان لوگوں کی فوز وفلاح کا سامان ہے۔ انہیں تو چاہیے تھا کہ ذوق و شوق سے اس کو سنتے۔ خلوص قلب سے اس کو قبول کرتے اور اس کی روشنی میں جادۂ زیست کے نشیب وفراز کو طے کرتے ہوئے منزل مقصود تک جا پہنچتے۔