تعارف سورۃ الشرح

اس سورۂ مبارکہ کا نام ’الشرح‘ ہے جو "الم نشرح" سے بابِ "انفعال" کا مصدر ہے۔ اس میں ایک رکوع، آٹھ آیتیں، ستائیس کلمے اور ایک سو تین حروف ہیں۔

نزول

اس کا نزول بھی مکہ مکرمہ میں سورۂ الضحیٰ کے معاً بعد ہوا۔

مضامین

نبوت کا بار امانت کوئی معمولی بوجھ نہ تھا۔ یہ وہ کوہِ گراں تھا جسے آسمانوں اور پہاڑوں نے بھی اٹھانے سے معذور ظاہر کردی تھی۔ حضور نبی کریم صلی اللہ علیہ وآلہ وسلم نے دعوت توحید کا آغاز کیا تو مکہ کی ساری فضا سلگنے لگ گئی۔ لوگوں کے اطوار بدل گئے۔ ہر چہرہ پر نفرت، ہر آنکھ میں عناد کے شعلے ناچنے لگے۔ ان سراسر ناموافق حالات میں قلب نبوت کے لیے راحت و سکون کا اگر کوئی پیغام ہوسکتا تھا تو وہ اس کے کریم پروردگار کا ہی ارشاد ہوسکتا تھا۔ چنانچہ جبرائیل امین حاضر ہوئے اور یہ سورہ اپنے ملکوتی اور نورانی ہونٹوں سے تلاوت کر کے سنائی۔ ہر آیت میں ایک عظیم احسان کا مژدہ، ہر آیت میں دلجوئی اور بندہ نوازی اپنے جوبن پر ہے۔ جس سے اپنوں نے بھی آنکھیں پھیر لی تھیں، رشتے تڑ لیے تھے، جس کی شمع حیات کو بجھانے کے لیے تند آندھیاں امڈ رہی تھیں مگر رسول اکرم صلی اللہ علیہ وآلہ وسلم اس کو یہ بشارت دی جارہی ہے کہ ’و رفعنا لک ذکرک‘ اے حبیب پاک صلی اللہ علیہ وآلہ وسلم! ہم نے آپ کے ذکر کو بلند فرما دیا ہے۔ عرب کے ریگزاروں میں ہی نہیں، دنیا کے شرق و غرب میں ہی نہیں بلکہ فراز عرش پر بھی تیرے ذکر پاک سے بہار کا سماں ہوگا۔ جہاں جہاں خالقِ کائنات کا ذکر ہوگا وہاں وہاں باعث تخلیقِ کائنات کے ذکر کے زمزمے بھی فردوس گوش بنیں گے۔ بتا دیا کہ یہ کالی رات سحر آشنا ہونے ہی والی ہے۔ مصائب کی گھنگھور گھٹائیں تھوڑی دیر میں چھٹنے والی ہیں۔ وہ دن عنقریب طلوع ہونے والا ہے جب اہل نظر تیری راہ میں آنکھیں بچھائیں گے۔ اہل دل سو جان سے تیری خاک راہ پر تصدق ہوں گے۔ آپ کا کام یہ ہے کہ جوں ہی فریضۂ تبلیغ سے کچھ فراغت ملے تو یادِ الٰہی میں مشغول ہوجایا کریں۔ یہی زندگی کی منزل مراد ہے اور اسی منزل مراد سے زندگی کو رعنائیاں، دلفریبیاں نصیب ہوتی ہیں اور اسی کے فیض سے زندگی کا دامن سچی مسرتوں سے معمور ہوجاتا ہے۔

حقیقت تو یہ ہے کہ اللہ تعالیٰ نے اپنے محبوب کی جو نعت اور مدحت ان چند آیات میں فرمائی ہے۔ دنیا بھر کے نعت گو اس سے دریوزہ گری کرتے رہیں گے۔