تعارف سورۃ الزلزلة

اس سورۂ کو ’الزلزلہ‘ اور ’الزلزال‘ بھی کہتے ہیں۔ اس میں ایک رکوع، آٹھ آیتیں، پینتیس کلمات اور ایک سو انتالیس حروف ہیں۔

نزول

اس کے نزول کے بارے میں بھی علماء کے دو قول ہیں: حضرت ابن عباس، مجاہد اور عطاء رضوان اللہ علیہم اجمعین کے نزدیک یہ مکی ہے۔ قتادہ اور مقاتل نے اسے مدنی بتایا ہے۔ سورہ کے مضامین میں غور کیا جائے تو پہلے قول کی تائید ہوتی ہے۔

مضامین

خدا فراموش انسان بڑی بےباکی اور بےحیائی سے زمین کے گوشے گوشے کو اپنے گناہوں سے داغ دار کرتا رہتا ہے۔ وہ خیال کرتا ہے کہ یہ درخت، یہ پتھر، یہ خاک کے ذرے گونگے بہرے ہیں۔ انہیں اس کے کرتوتوں کا احساس تک نہیں۔ لیکن یہ اس کی نادانی ہے۔ جب قیامت کے جھٹکوں سے کرۂ زمین پھٹ جائے گا۔ اس میں چھپی ہوئی سب چیزیں آشکارا ہوجائیں گی۔ اس وقت زمین کے وہ درخت جن کی گھنی چھاوں میں وہ داد عیش دیتا رہا اور وہ چٹانیں جن کی اوٹ میں وہ گناہوں کی بزمیں آباد کرتا رہا وہ چشم دید گواہوں کی طرح گویا ہوجائیں گے اور اس کے اعمال کا کچا چٹھا کھول کر سامنے رکھ دیں گے۔ اس وقت اس کی آنکھ کھلے گی لیکن بےسود! اس وقت لوگ گروہ در گروہ پیش کیے جائیں گے۔ ہر شخص کی ہر چھوٹی بڑی نیکی کا اجر اسے ملے گا۔ اسی طرح ہر شخص کی ہر چھوٹی بڑی بڑی برائی کا نتیجہ بھی اسے دیکھنا پڑے گا۔