تعارف سورۃ ہود

اس سورہ میں حضرت ہود علیہ السلام کا تذکرہ ہے اس مناسبت سے اسے آپ کے نام سے موسوم کیا گیا۔ یہ ایک سوتئیس آیات پر مشتمل ہے۔ اس کے کلمات کی تعداد ایک ہزار چھ سو اور حروف کی تعداد نو ہزار پانچ سو سڑسٹھ ہے۔

زمانہ نزول

ہجرت سے کچھ عرصہ پہلے اس کا نزول مکہ مکرمہ میں ہوا۔ قرائن اس بات پر شابد ہیں کہ سورہ یونس کے فوراً بعد یہ سورہ نازل ہوئی۔ اسلامی دعوت کا یہ وہ نازک دور ہے جب سنگین مزاحمتوں کے باوجود اسلام کا نور کفر و شرک کے پختہ مورچوں کو سر کرتا ہوا آگے بڑھ رہا ہے جس کے باعث کفار و مشرکین آتش زیرپا ہو گئے ہیں۔ اپنے ترکش جور و جفا کا ہر تیر آزمانے پر اتر آئے ہیں۔ اسلام اور رحمت عالم صلی اللہ تعالی علیہ وآلہ وسلم کے خلاف ان کی ہرزہ سرائی اور بہتان طرازی کمنیگی کی حد تک پہنچ چکی ہے۔ ناداراور بےبس مسلمانوں پر انہوں نے ظلم کی انتہا کر دی ہے‘ ان حالات میں اس سورہ کا نزول ہوتا ہے۔

مضامین

پہلے دو رکوعوں میں حسب سابق بڑے موثر پیرایہ میں کفار کے سامنے اسلام کے بنیادی عقائد توحید، وحی، رسالت اور قیامت پیش کئے گئے ہیں۔ انہیں بتایا گیا ہے کہ وہ ذات جس کا علم اتنا وسیع اور محیط ہے کہ کائنات کی ہر چیز کو وہ جانتا ہے۔ جس کے آغاز کی بھی اسے خبر ہے اور اس کے انجام پر بھی وہ آگاہ ہے۔ جس کے جودوسخاء کا یہ عالم ہے کہ وہ ہر چھوٹے بڑے جاندار کو اس کی مخصوص خوراک مطلوبہ مقدرار میں مناسب اوقات پر فراہم کر رہا ہے اور جس کی قدرت و حکمت کی یہ کیفیت ہے کہ بلندیوں (سماوات) اور پستیوں (ارض) کو اور ان میں جو کچھ ہے اس نے پیدا فرمایا۔ خود غور کرو! جس کا علم اتنا محیط۔ جس کا دسترخوان کرم اتنا وسیع، جس کی قدرت اتنی بےپایاں اور جس کی حکمت اتنی حیران کن ہو کیا اس کی الوہیت میں شک کی کوئی گنجائش ہے اور اس کے سوا کوئی اور ایسا ہے جس میں ان کمالات کا شائبہ تک بھی پایا جاتا ہو تاکہ خدائی اور الوہیت میں وہ اس کے شریک ہونے کا مدعی بن سکے۔ اور کیا ایسی قادر توانا ہستی کے لیے تمہیں مارنے کے بعد زندہ کرنا کوئی مشکل کام ہے‘ ہرگز نہیں۔

پھر انہیں فرمایا کہ اگر تم اپنے دعوی میں سچے ہو کہ قرآن اللہ تعالیٰ کا کلام نہیں بلکہ کسی انسان کا بنایا ہوا ہے تو پھر تم سب مل کر اس کی مثل کیوں پیش نہیں کر دیتے؟ زیادہ نہیں تو دس سورتیں ہی اس جیسی بنا لاؤ۔ اگر ملک سخنوری کے تاجدار ہونے کے باوجود تم دس سورتیں بھی پیش کرنے سے قاصر ہو تو پھر بےجا ضد نہ کرو اور مان لو کہ یہ اللہ تعالیٰ کا کلام ہے اور اس کا لانے والا اس کا سچا رسول ہے۔

حضور رحمت عالمیاں (صلی اللہ علیہ وآلہ وسلم) روز اول سے ہی ان لوگوں کو اسلام کے ان بنیادی عقائد کی دعوت بڑی دلسوزی اور خلوص سے دے رہے تھے لیکن ان کی ہٹ دھرمی اور تعصب میں آئے دن اضافہ ہوتا جا رہا تھا‘ ان کا رویہ اسلام کے خلاف سخت سے سخت ہو رہا تھا۔ کوئی دلیل ان پر کارگر ثابت نہیں ہو رہی تھی۔ کسی معجزہ سے ان کی چشم خرد کو بینائی نصیب نہیں ہو رہی تھی۔ اس لیے اس سورۃ میں بڑی وضاحت ان کے سامنے ان پہلی قوموں کے حالات بیان کیے گئے جنہوں نے اپنے انبیاء کے ساتھ ان جیسا سلوک کیا اور پھر جس ہولناک انجام سے وہ دوچار ہوئے اس پر بھی ان کو آگاہ کیا۔ کفار عرب کو بتا دیا کہ اللہ تعالیٰ کے نبی کی دعوت کو جو حقارت سے ٹھکراتے ہیں ان کی مخلصانہ مساعی کا جو بدبخت مذاق اڑاتے ہیں۔ انبیاء کے پیروکاروں کی غربت ، افلاس کے باعث ان کی محفل میں بیٹھنا اور ان سے ہم کلام تک ہونا جو لوگ اپنے لیے کسر شان سمجھتے ہیں ان کی مہلت کی گھڑیاں جب ختم ہو جاتی ہوں اور غور و فکر کرنے کے لیے جو فرصت انہیں دی جاتی ہے وہ انتہا کو پہنچ جاتی ہے تو پھر ان پر قہر خداوندی کی جبلی کڑکتی ہے اور ان کی ساری عظمتوں اور نخوتوں کو خاک میں ملا کر رکھ دیتی ہے۔ اے کفار عرب! اگر تم اس انجام بد سے بچنا چاہتے ہو تو آج آنکھیں کھولو اور دین حق کا دامن مضبوطی سے تھام لو۔

ایک بات توجہ طلب ہے؛ ہر قوم، ہر معاشرہ اپنے مخصوص سیاسی، معاشی اور معاشرتی حالات کے زیر اثر مختلف قسم کی غلط کاریوں کا شکار ہوتا ہے اور ان کی اصلاح کے لیے جب کوئی مصلح میدان میں نکلتا ہے تو اس کی قوم کا ردعمل بھی خالص نوعیت کا ہوتا ہے کہیں قوم نوح کی طرح جہالت کی تاریکی اور تقلید کا جمود اپنے پنچے گاڑے ہوتا ہے اور کہیں قوم لوط کی طرح عیش و عشرت اور نفس کی ہولناکیوں نے اخلاقی انحطاط اور آوارگی پیدا کر دی ہوتی ہے۔ کہیں قوم شعیب کی مانند تجارت کی ہماہمی نے کاروباری بددیانتی کا بازار گرم کر دیا ہوتا ہے۔ اور کہیں قوم ثمود کی طرح صنعت و حرفت میں ترقی کے باعث ذہن بگڑ چکے ہوتے ہیں اور دل مسخ ہو جاتے ہیں اور کہیں فرعونی استبداد نے قوم سے آزادی فکر و عمل کی صلاحیتیں سلب کرلی ہوتی ہیں اور جب کوئی مصلح اصلاح احوال کے لیے کوشاں ہوتا ہے تو اسے مختلف قسم کے ردعمل سے واسطہ پڑتا ہے۔

انبیاء سابقین کی بعثت کیونکہ صرف ایک مخصوص حلقہ کے لیے اور ایک محدود وقت تک تھی۔ اس لیے ان کی تعلیمات بھی انہیں مقامی اور وقتی ضروریات کے مطابق تھیں لیکن وہ مرشد اعظم اور ہادی اکمل (صلی اللہ علیہ وآلہ وسلم) جو تمام اقوام کے لیے اور قیامت تک کے لیے تشریف فرما ہوا۔ اس نے ہر معاشرہ کی اصلاح کرنا تھی اور بوقلموں حالات سے دو چار ہونا تھا۔ اس کے مخاطب صحراؤں اور جنگلوں کے ناخواندہ عوام بھی تھے اور شہروں اور آبادیوں کے متمدن باشندے بھی، ملوکیت کی زنجیروں میں جکڑے ہوئے غلام بھی تھے اور صنعت و حرفت میں اوج کمال تک پہنچے ہوئے لوگ بھی، دولت و ثروت کے خمار سے مخمور بھی اور مفلس و خستہ حال بھی حضور کریم (صلی اللہ علیہ وآلہ وسلم) نے ان مختلف طبقوں میں پیدا ہونے والی متنوع غلط کاریوں کی اصلاح کرنا تھی۔ اس لیے اللہ تعالیٰ نے سابقہ اقوام کی سیرتوں اور اپنے انبیاء پر ان کے اعتراضات اور دعوت حق کے مقابلہ میں ان کا ردِعمل ایک ایک کرکے بیان فرما دیا تاکہ حضور کریم علیہ الصلوٰۃ والسلام کو ان تمام احوال سے آگاہ کر دیا جائے جن سے حضور (صلی اللہ علیہ وآلہ وسلم) کو دو چار ہونا تھا۔ تاکہ کوئی بات خلاف توقع نہ ہو اور کوئی ردعمل باعث حیرت و استعجاب نہ بنے۔

ان تمام امور کو اس سورۃ مبارکہ میں بڑے دلنشین اسلوب میں بیان کرنے کے بعد اللہ تعالیٰ اپنے محبوب مکرم (صلی اللہ علیہ وآلہ وسلم) کو حکم دیتے ہیں ’فاستقم کما امرت ومن تاب معک‘ آپ اور آپ کے ساتھ حکم الٰہی کو بجالانے کے لیے حالات کی سنگینی اور ماحوال کی ناسازگاری کی پرواہ نہ کرتے ہوئے مستعد اور ثابت قدم رہیں۔ اور پھر یہ بھی فرما دیا کہ انبیاء علیہم السلام کے واقعات بیان کرنے کا مقصد صرف یہی ہے کہ ’نثبت بہ بؤادک‘ آپ کے دل کو ثبات و قرار نصیب ہو۔

آپ عبادت الٰہی میں سرگرم رہیں اور اس کی تائید و نصرت پر بھروسہ رکھیں۔ اللہ تعالیٰ کی تائید و نصرت کے سامنے دشمنان اسلام کا کوئی منصوبہ کامیاب نہیں ہوگا اور فتح و نصرت آپ کے قدم چومے گی۔