تعارف سورۃ لقمان

اس سورہ کا نام لقمان ہے یہ نبوت کے مکی دور کے وسط میں نازل ہوئی اس سورہ میں چار رکوع، چونتیس آیتیں، پانچ صد اڑتالیس کلمے، دو ہزار ایک سو دس حروف ہیں۔

قرآن کریم کی پر ازحکمت تعلیمات انسانی زندگی کو جن بےپایاں برکتوں سے مالامال کرتی ہیں اور اپنے ماننے والوں کے عقیدہ، عمل اور سیرت میں جو روح پرور انقلاب برپاکرتی ہیں ان کے ذکر جمیل سے اس سورہ کا آغاز ہورہا ہے۔ اس کے بعد بتایا کہ جو لوگ قرآن کی دعوت حق کو قبول نہیں کرتے ان کی زندگیاں ہرقسم کی معنویت اور مقصد یت سے محروم ہوتی ہیں۔ ان کے سامنے سفلی جذبات کی تسکین اور دولت سمیٹنے کے بغیر کوئی منزل ہی نہیں ہوتی۔ اس کے لیے وہ ہر قسم کی لغویات وخرافات کا بیوپار کرنے سے دریغ نہیں کرتے۔ انہیں اس بات کا ذرا احساس نہیں ہوتا کہ ان کے طریقہ کار سے ان کی قوم ا خلاقی لحاظ سے دیوالیہ ہو جائے گی اور رزمگاء حیات میں بری طرح پٹ جائے گی۔ ان بد بختوں کے دلوں میں قبول حق کی استعدادبھی دم توڑچکی ہے۔ وہ اندھیروں کے خوگرہیں، روشنی کی ایک کرن بھی ان کے لیے ناقابل برداشت ہے جس سمت سے حق کی صدائے دلنوازآرہی ہو۔ وہ ادھرپیٹھ پھیر دیتے ہیں اور دم دبا کر بھاگ نکلتے ہیں تاکہ وہ اتنی درو چلے جاہیں کہ حق کی آواز انہیں سنانی تک نہ دے۔

اس سورہ پاک کی خصوصیت یہ ہے کہ تعلیمات اسلامی کا اعلان ایک مرد دانا لقمان سے کرایا جارہا ہے جو نُوبہ (سوڈان) کے گمنام اور پسماندہ علاقہ کا باشندہ ہے اور جس کی رنگت حبشیوں کی طرح سیاہ ہے اور اسی کے نام سے سورہ کو معنون فرمایا۔ لقمان بڑے پیارے انداز سے اپنے لخت جگر کو نصیحت کرتے ہوئے سنائی دیتے ہیں۔ اس میں حکمت اس حقیقت کو آشکارا کرنا ہے کہ ان محاسن سے جو بھی اپنے آپ کو آراستہ کرلے وہ ساری انسانیت کی نگاہوں میں محترم ہوجاتاہے۔ ساری قومیں اس کا ذکر بڑی عزت سے کرتی ہیں اور اس کی حکمت آموز باتوں کو اپنے دلوں میں جگہ دیتی ہیں۔ عقائد صحیحہ کانور‘ اعمال صالحہ کا حسن اور سیرت کی دلکشی، کالے حبشی کو بھی سب کا محبوب بنا دیتی ہے۔ جسمانی حسن سے سیرت کا جمال کہیں دلکش ہے۔ اس کی برکت سے بھدے نقوش اور کالی رنگت پر بھی ایک ایسا روپ آجاتا ہے کہ بڑے بڑے حسینان عالم مبہوت ہوکر رہ جاتے ہیں۔ انسان کو انسان کامل بنانے کے لیے جن تعلیمات کی ضرورت تھی وہ دلنشین اسلوب میں حضرت لقمان کی زبان سے کھلوا دی گئیں اور انہیں ’من عزم الامور‘ فرما کر ان کی اہمیت کا اظہار کر دیا گیا۔

علاوہ ازیں ان ظاہری وباطنی انعامات کا ذکر فرمایا جو بڑی فیاضی سے انسان کو بخشے گئے، لیکن اسکے باوجود بعض لوگ جدل و مکابرہ اور ناشکری کی روش سے باز نہیں آتے۔ بعض جہالت اور بیجا ضد سے اہل حق سے جھگڑتے رہتے ہیں۔ گویا وہ ادھار کھائے بیٹھے ہیں کہ وہ شیطان کا دامن کسی قیمت پر نہ چھوڑیں گے خواہ وہ انہیں جہنم کے بھڑکتے ہوئے شعلوں میں ہی کیوں نہ پھینک دے۔ لیکن سب انسان یکساں نہیں ان میں ایسے الطبع افراد بھی ہیں جنہوں نے صدق دل سے اللہ تعالیٰ کے رسول کی دعوت کو قبول کر لیا ہے۔ اپنے آپ کو اپنے تمام معاملات کو کلیتہً اپنے پروردگار کے سپرد کر دیا ہے۔ بتا دیا کہ یہی لوگ ہیں جنہوں نے ایک ایسے حلقے کو پکڑ لیا ہے جو ٹوٹنے والا نہیں۔

متعدد تکوینی دلائل ذکر کرکے اللہ تعالیٰ کی وحدانیت، قدرت کاملہ، حکمت بالغہ اور علم محیط کو ثابت کیا گیا ہے۔ آخر میں بتا دیا کہ ظاہری علوم تو بجائے خود اس کی ہمہ دانی کا تو یہ حال ہے کہ پوشیدہ سے پوشیدہ چیز بھی اس سے مخفی نہیں، وہ امور جن کو جاننے سے انسان کی ظاہری و باطنی قوتیں اور اس کے سائنسی آلات سراسر عاجز ہیں جن اسرار پر آگاہی حاصل کرنا انسان کے حیطہ امکان سے بھی خارج ہے۔ وہ واقعات جو ابھی وقوع پذیر ہی نہیں ہوئے بلکہ پردہ غیب میں مستور ہیں۔ اللہ تعالیٰ ان سب کو جانتا ہے۔ اس کا علم اتنا کامل اور محیط ہے کہ ہر چیز بہمہ وجوہ اس پر منکشف ہے۔