تعارف سورۃ سباء

اس سورہ پاک کا نام ’سبا‘ ہے۔ یہ لفظ آیت نمبر پندرہ میں مذکور ہے۔ اس کی آیتوں کی تعداد چون ہے، آٹھ صد تینتیس کلمات اور ایک ہزار پانچ سو بارہ حروف ہیں۔

زمانہ نزول

یہ سورہ مکی ہے۔ حتمی طور پر اس کی تاریخ نزول کا تعین نہیں کیا جا سکتا۔ لیکن اس کے مضامین سے یہ اندازہ باسانی لگایا جا سکتا ہے کہ یہ سورہ مکی دور کے وسط میں نازل ہوئی۔ جب کہ اسلام کی دعوت نے اہل مکہ کو چونکا دیا تھا اور وہ محض طعن وتشنیع اور استہزا و تمسخر سے ہی اس دعوت کو ناکام بنا دینا چاہتے تھے۔ ابھی انہیں اس حقیقت کا پوری طرح احساس نہیں ہوا تھا کہ یہ دعوت ایک ایسے ہمہ گیر انقلاب کی دعوت ہے جو ان کے ظاہری ماحول، معاشرتی رسم ورواج اور معاشی نظام کوہی درہم برہم نہ کر دے گی، بلکہ اس سے آگے بڑھ کر ان کے دلوں اور ذہنوں کی دنیا کو بھی بدل دے گی۔

مضامین

سورہ کی ابتدا حمد باری تعالیٰ سے کی جا رہی ہے اور اس کی کبریائی اور عظمت کا اعلان کیا جا رہا ہے، اس کے بعد وقوع قیامت پر کفار کو جو اعتراض تھا اس کا جواب ’بَلَى وَرَبِّي لَتَأْتِيَنَّكُمْ عَالِمِ الْغَيْبِ‘ کے زور دار الفاظ سے دیا جا رہا ہے کہ اس رب کی قسم! جو عالم الغیب ہے قیامت ضرور آئے گی۔ ساتھ ہی ’’لیجزی‘‘ سے وقوع قیامت کی حکمت بھی بیان کر دی کہ اس کے بغیر عدل وانصاف کے تقاضے پورے نہیں ہو سکتے۔ نیک لوگوں کو ان کے اعمال حسنہ پر جزا اور بدکاروں کو ان کی سیاہ کاریوں کی سزا قیامت کے روز ہی پوری طرح مل سکتی ہے۔

اللہ تعالیٰ اپنے نیک اور مقبول بندوں کو اس دنیا میں جن انعامات واحسانات سے سرفراز کرتا ہے اور جو عزت وسروری بخشتا ہے حضرت داؤد اور حضرت سلیمان علیہما السلام کے ذکر سے اس کا اظہار فرما دیا۔ اس ہیبت وجلال کے باوصف جس طرح وہ اپنا حق بندگی ادا کرتے رہے اور اپنے منعم حقیقی کے شکر گزار بنے رہے۔ اس کا بیان کر کے ہمیں ان کے نقش قدم پر چلنے کی ترغیب دلائی اور یہ سمجھا دیا کہ اللہ تعالیٰ کے بندے نعمتوں اور آسائشوں کے باوجود اطاعت وانقیاد کا طریقہ اپنائے رکھتے ہیں۔ بارگاہ الٰہی میں ان کی یہ سرافگندگی ان کی عظمت کو کم نہیں کرتی بلکہ اسے چار چاند لگا دیتی ہے۔

ان کے ذکر کے بعد ایک ایسی بستی کا حال بیان کیا جو خوشحالی کی زندگی بسر کر رہی تھی جن کا آبپاشی کا نظام بڑا ترقی یافتہ تھا۔ ان کا ملک سرسبز وشاداب باغات اور لہلہاتے ہوئے کھیتوں اور ان میں رواں نہروں کے باعث رشک فردوس بنا ہوا تھا۔ لیکن جب وہ اپنے رب غفور کو بھول گئے۔ نفس پروری اور شیطان کی پیروی اختیار کی توہر چیز ملیا میٹ کر دی گئی۔ ان کا وہ مضبوط ڈیم جو ان کی خوشحالی کا ضامن تھا، وہی ان کی تباہی وبربادی کا سبب بن گیا۔ اس واقعہ کا بڑے دلنشین پیرایہ میں ذکر کر کے نافرمانی اور سرکشی کرنے والوں کو یہ سمجھا دیا کہ ان کا انجام بڑا حسرتناک ہوگا۔

اس سورہ کی یہ آیت ’وَلَقَدْ صَدَّقَ عَلَيْهِمْ إِبْلِيسُ ظَنَّهُ فَاتَّبَعُوهُ إِلَّا فَرِيقًا مِّنَ الْمُؤْمِنِينَ.‘ بڑی غور طلب اور عبرت انگیز ہے۔ ابلیس کو حکم ہوا کہ ابوالبشر کو سجدہ کرو جسے میں نے علوم لدنیہ اور معارف حقانیہ سے بہرہ ور فرما کر اپنی خلافت کا منصب بخشا ہے، اس نے ازراہ تکبر تعمیل حکم سے انکار کیا۔ جس کی پاداش میں اسے راندہ درگاہ بنا دیا گیا۔ اس نے چیلنج دیا کہ میں آدم کی اولاد کو تیرا نافرمان اور ناشکر گزار بنا کر چھوڑ وں گا۔ دانشمندی کا تقاضا تو یہ تھا کہ اولاد آدم اپنے اس ازلی دشمن کے مکر و فریب سے چوکنی رہتی اور اللہ تعالیٰ کی شکر گزاری میں سرگرم عمل رہتی۔ لیکن صد حیف! کہ انسان کو تاہ اندیش ثابت ہوا۔ اس نے اپنے بد اندیش دشمن کے ورغلانے سے اپنے رب کریم کی اطاعت سے منہ موڑ لیا۔ اس طرح شیطان کو غرانے کا موقع دیا۔ ہر مومن کو یہ آیت پیش نظر رکھنی چاہئے کہ شیطان تو صرف دلوں میں وسوسہ اندازی کر سکتا ہے۔ اس کو کسی پر ایسا قابو ہرگز نہیں جو اس کو مجبور محض بنا دے۔ اس لئے جو حماقت اہل سبا سے سرزد ہوئی اور شیطان کو اپنی کامیابی پر بغلیں بجانے کا موقع مل گیا۔ ہم ایسی حماقت سے باز رہیں اور اپنے دشمن کو خوش ہونے کا موقع نہ دیں۔

نیز بتا دیا کہ حضور نبی رحمت محمد مصطفی (صلی اللہ علیہ وآلہ وسلم) کی بعثت تمام نوع انسانی کے لئے تا قیام قیامت حضور (صلی اللہ علیہ وآلہ وسلم) راہنما بن کر تشریف لے آئے ہیں۔ حضور (صلی اللہ علیہ وآلہ وسلم) کے بعد نہ کسی نئے نبی کی ضرورت ہے اور نہ ہی کوئی نیا نبی مبعوث ہوگا۔

اکثر اہل ثروت اس غلط فہمی کا شکار ہو جاتے ہیں کہ وہ جو کرتے ہیں وہی درست ہے اور جو وہ سوچتے ہیں وہی حق ہے۔ دوسروں پر لازم ہے کہ وہ آنکھیں بند کر کے ان کے پیچھے چلتے رہیں۔ افلاس و احتیاج بھی اکثر لوگوں کو ہوش و خرد سے محروم کر دیتا ہے اور انجام سے بےنیاز ہوکر یہ لوگ اہل ثروت کے پیچھے چلنے لگتے ہیں اور ان کے اشاروں پر ایسی ایسی خرمستیاں کرتے ہیں کہ آنکھیں نمناک ہوجاتی ہیں۔ غلط راہ پر جو بھی چلے امیر ہو یا غریب، راعی ہو یا رعایا المناک نتائج سے لامحالہ اسے دو چار ہونا پڑتا ہے۔ وہ زیردست لوگ جن کی دنیوی زندگیاں محرومیوں کا شکار ہیں، روز محشر جب دوزخ کے شعلوں کو اپنی طرف لپکتے ہوئے دیکھیں گے تو اپنے لیڈروں اور اپنے زعماء کو بےنقط سنائیں گے اور ان کے لیڈر جو جواب انہیں دیں گے اس کا تذکرہ قرآن کریم میں دیگرمقامات کے علاوہ یہاں بھی بڑے موثر انداز میں کر دیا گیا ہے تاکہ لوگ کسی کی دنیاکے لئے اپنی آخرت برباد نہ کرتے رہیں۔

ساتھ ہی یہ بھی واضح فرمایا کہ شرف انسانی کا انحصار کثرت مال و جاہ پر نہیں اور نہ محض مال واولاد کی وجہ سے کسی کو قرب الٰہی نصیب ہوتا ہے۔ اللہ تعالیٰ کی بارگاہ میں تو صرف ایمان اور عمل صالح وجہ شرف اور باعث قرب ہے جو خدا کی رضا کا طلبگار ہے وہ ایمان کی شمع کو فروزاں کر کے اعمال حسنہ کے پھول کھلاتا ہوا آگے بڑھتا آئے۔ حریم کبریائی کے دروازے وہ اپنے لئے کھلے ہوئے پائے گا۔