تعارف سورۃ الاحزاب

اس سورہ پاک کا نام الاحزاب ہے۔ جو اس صورت کی آیت 20 میں مذکور ہے۔ نیز اس میں غزوہ احزاب کا تفصیلی تذکرہ ہے، جو نتائج کے اعتبار سے ایک فیصلہ کن جنگ تھی۔ اس لئے اس سورہ کو اسی نام سے معنون کیا گیا۔ اس میں نو رکوع، تہتر آیتیں اور ایک ہزار دو صد اسی کلمات اور پانچ ہزار سات صد نوے حروف ہیں۔

زمانہ نزول

یہ سورہ مدینہ طیبہ میں نازل ہوئی۔ اس میں جن واقعات کا تذکرہ ہے یعنی غزوہ احزاب، بنی قریظہ اور نکاح حضرت زینب رضی اللہ تعالیٰ عنہا‘ وہ اس بات کی شہادت دے رہے ہیں کہ اس کا نزول 5 ھ میں ہوا۔

مضامین

اس سورہ مبارکہ میں تاریخ اسلام کے اہم واقعات بیان کئے گئے ہیں۔ عرب کے جاہلانہ رسم ورواج میں دور رس اور انقلابی نوعیت کی اصلاحات کی گئی ہیں۔ سرور عالم (صلی اللہ علیہ وآلہ وسلم) کی خانگی زندگی کے کئی گوشوں کو آشکارا کیا گیا ہے۔ ازواج مطہرات اور خاندان رسالت کر خصوصی ہدایات اور ارشادات فرمائے گئے ہیں۔ مسلم معاشرہ میں مردو زن کے آزادانہ اختلاط کو روکا گیا ہے۔ پردہ کے نظام کو بروئے کار لانے کے لئے ابتدائی ہدایات دی گئی ہیں۔ حضور سر ور کائنات (صلی اللہ علیہ وآلہ وسلم) کے خاتم النبین ہونے کا اعلان فرمادیا گیا ہے۔ ان تمام امور نے اس سورہ کو بڑی اہمیت بخش دی ہے۔

اس سورہ کے آغاز میں عہد جاہلیت کی رسوم وعادات پر ضرب کاری لگائی گئی ہے لیکن اس سے پہلے یہ فرمادیا کہ بندہ مومن پر لازم ہے کہ اپنے خداوند ذوالجلال کے ہر حکم کی بےچون و چراں تعمیل کرے اور اگر ایسا کرتے ہوئے اسے لوگوں کی ملامت کا ہدف بننا پڑے یا لوگوں کی برہمی اور مخالفت کا سامنا کرنا پڑے تو ذرا نہ گھبرائے بلکہ اپنے رب کریم پر توکل کرے اور اپنے سارے کام اس کے سپرد کر دے‘ اس سے بہتر کارساز اور کون ہو سکتا ہے؟ ساتھ ہی یہ نکتہ بھی بیان کر دیا کہ دل ایک ہی ہوتا ہے، یا اس دل میں دنیا اور اہل دنیا کی محبت خیمہ زن ہوگی یا خدا کی بندگی کا جذبہ اپنا پرچم لہرائے گا۔ ان دو میں سے ایک کا انتخاب ناگزیر ہے۔ اگر انسان کے پہلو میں دو دل ہوتے تو ممکن تھا کہ ایک دل میں خدا اور دوسرے میں دنیا کو وہ جگہ دے دیتا، اور بیک وقت دونوں کشتیوں میں سوار رہ سکتا۔ لیکن دل صرف ایک ہے، اب یہ تمہاری مرضی چاہے اسے بیت اللہ بناؤ چاہے اسے دنیا کی آلائشوں کے سپرد کردو۔

اس اثر آفرین اور دلنشین تمہید کے بعد عہد جاہلیت کی دو رسموں کا قلمع قمع کر دیا۔ اس وقت یہ رواج تھا کہ اگر کسی کی زبان سے اپنی بیوی کے بارے میں یہ لفظ نکل جاتے کہ تو میرے لئے میری ماں کی طرح ہے تو وہ ہمیشہ کے لئے اس پر حرام ہوجاتی‘ یہ بالکل لغوبات تھی۔ صرف زبان ہلادینے سے ایک عورت اس کی ماں کیسے بن سکتی ہے؟ اس لئے اس رسم کو باطل قرار دیا۔ لیکن بیوی کو ماں کہنا بھی پرلے درجے کی حماقت ہے اس لئے ایسا کہنے سے بھی روک دیا اور اس قسم کی غیر ذمہ دارانہ گفتگو کرنے والے پر کفارہ ادا کرنا لازم قرار دے دیا ہے۔

دوسرا رواج ان میں یہ تھا کہ اگر کوئی شخص کسی دوسرے کے بیٹے کو اپنا متبنیٰ بنا لیتا تو وہ ہر لحاظ سے اس کا حقیقی بیٹا شمار ہوتا۔ حقیقی بیٹے کے تمام حقوق اور سب مراعات اسے حاصل ہو جاتیں۔ وہ وراثت میں حصہ دار بن جاتا۔ اس کی بیوی متبنیٰ بنانے والے پر حرام ہو جاتی۔ گھر کی مستورات کے ساتھ اس کا خلط ملط حقیقی بیٹے کی طرح بےتکلفانہ اور بےحجابانہ ہوتا۔ یہ قبیح رسم طرح طرح کی حق تلفیوں اور اخلاقی قباحتوں کا سبب بن کر رہ گئی تھی۔ متوفی کے حقیقی وارث جدی جائیداد سے محروم ہوجاتے اور ایک اجنبی لے پالک سب کچھ ہڑپ کر جاتا۔ ایک اجنبی نوجوان بےحجابانہ وقت، بےوقت جب آنے جانے لگتا تو اس طرح کئی اخلاقی قباحتیں جنم لینے لگتیں۔ اس لیے ضروری تھا کہ اس قبیح رسم کی بیخ کنی کر دی جاتی، لیکن صدہا سال سے یہ رسم چلی آرہی تھی۔ ا س کی جڑیں وہاں کی سوسائٹی میں گہری ہو چکی تھیں لہٰذا ناگزیر تھا کہ سرور عالم (صلی اللہ علیہ وآلہ وسلم) خود عملی طور پر اس رسم کو جڑ سے اکھاڑ پھینکتے۔ چنانچہ حضرت زید جو حضور (صلی اللہ علیہ وآلہ وسلم) کے متبنی تھے، ان کی زوجہ حضرت زینب سے بعد طلاق حضور (صلی اللہ علیہ وآلہ وسلم) نے نکاح فرما کر اس قبیح رسم کا خاتمہ کر دیا۔ اگرچہ بدفطرت لوگوں نے طوفان بدتمیزی برپا کیا، لیکن حضور سرور کونین (صلی اللہ علیہ وآلہ وسلم) کی آفتاب سے تابندہ تر زندگی اور سیرت کے سامنے وہ فتنہ اپنی موت آپ مر گیا۔

غزوہ احد میں گھاٹی کے تیر اندازوں کی فروگزاشت کے باعث مسلمانوں کو سخت جانی نقصان اٹھانا پڑا۔ کفار مکہ کے دلوں میں اپنی بالادستی کا خیال جم گیا۔ انہوں نے مسلمانوں کے خلاف اپنی سر گرمیاں تیز کر دیں۔ صحرائی بدوقبائل نے بھی جب مسلمانوں کے جانی نقصانات کا چرچا سنا تو انہوں نے بھی شرارتیں شروع کر دیں۔ مدینہ طیبہ میں یہودیوں کے جو قبائل بنی نضیر اور بنی قریظہ آباد تھے‘ باوجود دوستی کے معاہدوں کے وہ بھی مسلمانوں کو آنکھیں دکھانے لگ گئے۔ مسلمانوں کے ایک دستہ نے لاعلمی سے بنی عامر کے دو آدمی مار ڈالے۔ ان کی دیت میں حسب معاہدہ بنی نضیر کو بھی اپنا حصہ ادا کرنا تھا۔ حضور (صلی اللہ علیہ وآلہ وسلم) ان کے محلہ میں تشریف لے گئے اور انہیں اپنا حصہ ادا کرنے کے لئے کہا، وہ بظاہر بڑے احترام سے پیش آئے اور ایک مکان کی دیوار کے نزدیک حضور (صلی اللہ علیہ وآلہ وسلم) کو بٹھایا۔ چھت پر چکی کا ایک بھاری پاٹ رکھا تھا۔ انہوں نے سازش کی کہ چپکے سے کوئی آدمی اوپر چڑھ جائے اور اس کو نیچے پھینک دے۔ ان کا ارادہ حضور (صلی اللہ علیہ وآلہ وسلم) کو شہید کرنے کا تھا۔ جبرئیل امین علیہ السلام نے حسب حکم الٰہی فوراً مطلع کر دیا۔ حضور (صلی اللہ علیہ وآلہ وسلم) وہاں سے اٹھ کر چلے آئے۔ بنی نضیر کو اس غدر کے باعث حکم دیا کہ وہ دس دن کے اندر مدینہ سے نکل جائیں۔ عبد اللہ بن ابی کی انگیخت پر پہلے تو وہ اکڑ گئے اور مدینہ چھوڑنے سے صاف انکار کر دیا۔ نبی کریم (صلی اللہ علیہ وآلہ وسلم) نے ان کے محلہ کا محاصرہ کر لیا۔ کوئی منافق ان کی امداد کے لئے نہ آیا۔ آخر انہوں نے جان بخشی کی التجا کی جو قبول کر لی گئی اور ایک ایک اونٹ پر جتنا گھریلو سامان وہ لے جا سکتے تھے، انہیں لے جانے کی اجازت دے دی گئی۔ یہ لوگ خیبر اور وادی القریٰ میں جا کر آباد ہو گئے۔ انہوں نے مشرکین عرب کو مدینہ طیبہ پر حملہ کرنے کے لئے اکسایا اور عرب کے بدو قبائل کے پاس بھی ان کے وفد گئے۔ انہیں بھی اپنے ساتھ ملا لیا۔ چنانچہ دس بارہ ہزار کے لشکر نے ایک چھوٹی سی بستی پر ہلہ بول دیا۔ لیکن اللہ تعالیٰ نے ان کو خائب و خاسر کیا اور اپنے رسول مکرم کو فتح مبین عطا فرمائی۔ اس سے ایک تو یہ فائدہ ہوا کہ کفار کے غبارہ سے ہمیشہ کے لئے ہوا نکل گئی۔ پہلے وہ حملہ آور تھے اور مسلمان صرف دفاعی جنگ لڑ رہے تھے۔ اب مسلمان آگے بڑھ کر حملہ کرنے کی پوزیشن میں ہو گئے اور کفار صرف دفاع اور وہ بھی ’’بے دلی‘‘ سے کرنے پر قانع ہوگئے۔ حضور (صلی اللہ علیہ وآلہ وسلم) نے اس روز اعلان فرما دیا: آج کے بعد قریش تم پر لشکر کشی نہ کر سکیں گے، اب تم ہی ان پر لشکر کشی کرو گے۔

دوسرا فائدہ یہ ہوا کہ منافق بےنقاب ہو گئے۔ اس نازک مرحلہ میں انہوں نے جس بزدلی اور لاتعلقی کا ثبوت دیا، اس نے ان کو بےنقاب کر دیا۔ اب مسلمان ان کو خوب پہچان گئے اور ان کی اذیت رسانیوں سے محتاط ہو گئے۔ تیسرا فائدہ یہ ہوا کہ بنی قریظہ یہودی قبیلہ جس کے مسلمانوں کے ساتھ عہدو پیمان تھے اس نے جنگ کے دوران میں عہد شکنی کی اور دشمن کے ساتھ مل گیا، لیکن حضور (صلی اللہ علیہ وآلہ وسلم) کی حکمت عملی سے مشرکین اور یہود کی اجتماعی کوششیں ناکام ثابت ہوئیں۔ آخر کار یہ قبیلہ بھی کیفر کردار کو پہنچا۔ اس طرح اللہ تعالیٰ نے دشمنان حق کے دلوں پر اسلام کی دھاک بٹھا دی۔ عرب کے سارے قبائل سہم گئے۔ ان کے دلوں میں مدینہ طیبہ پر حملہ کرنے کے جو فاسد خیالات وقتاً فوقتاً پیدا ہو تے رہتے تھے، وہ ہمیشہ کے لئے ختم ہوگئے۔ مدینہ طیبہ کی فضا اب یہود کی اذیت رسانیوں سے محفوظ ہو گئی۔

عام طور پر سیاسی راہنماؤں کی خانگی زندگی اور پبلک زندگی الگ الگ ہوا کرتی ہے۔ ان میں بین تضاد پایا جاتا ہے۔ وہ دوسروں کو تو سادگی اور کفایت شعاری کی تلقین کرتے ہیں اور ان کے اپنے گھروں میں تکلفات اور سامان عشرت کی بھر مار ہوتی ہے۔ وہ لوگوں کو اعلیٰ کردار اور پاکیزہ سیرت کی تلقین کرتے ہیں، لیکن ان کے اہل خانہ کا دامن غفلت، سہل انگاری اور طرح طرح کی آلودگیوں سے ملوث ہوتا ہے لیکن راہبر انسانیت (صلی اللہ علیہ وآلہ وسلم) کے اہلبیت کو حکم دیا جا رہا ہے کہ اگر تمہیں دنیا کی آسائشیں اور آرائشیں عزیز ہیں تو پھر اللہ تعالیٰ کے محبوب رسول کے گھر کی زینت نہیں بن سکتی ہو۔ سارے خاندان نبوت کے لئے اخلاق، عبادات، تزکیہ باطن اور پاک نفسی کا ایک مخصوص منشور پیش کیا جا رہا ہے، انہیں ان کے مقام رفیع کا احساس دلا کر اس کی عظیم ذمہ داریوں کو نبھانے کا تاکیدی حکم دیا جا رہا ہے۔

پردے کا جو حکیمانہ نظام قرآن کریم سارے مسلم معاشرہ میں نافذ کرنا چاہتا ہے، اس کے ابتدائی احکامات بھی اس سورہ ذکر کر دئیے گئے ہیں۔ لیکن کردار کی بلندی، اخلاق کی پاکیزگی، عبادات الٰہی میں ذوق وشوق صرف خانوادہء نبوت تک ہی محدود نہیں بلکہ امت مسلمہ کے ہر مردوزن کو جن خوبیوں سے متصف ہونا چاہئے آیت 35 میں بڑی تفصیل سے ان کو بیان کر دیا گیا۔

ان تمام امور کے علاوہ اللہ تعالیٰ نے اپنے محبوب کریم (صلی اللہ علیہ وآلہ وسلم) کو جن خصوصی انعامات، عظیم احسانات اور غیر متناہی کمالات سے سرفراز فرمایا ہے، ان کو بڑے دلفریب انداز میں اس سورہ میں بیان کر دیا گیا تاکہ جن و انس بلکہ ساری کائنات کو پتہ چل جائے کہ وہ ہستی جو قرآن کریم جیسی عظیم البرکت کتاب لے کر تشریف لائی ہے، جو اسلام جیسے دین فطرت کی داعی بن کر آئی ہے، جس نے نوع انسانی کو قیامت تک کے لئے شریعت بیضاء کی صورت میں ایک جامع ضابطہ حیات مرحمت فرمایا ہے اس کی شان اپنے بھیجنے والے کی بارگاہ میں کیا ہے تاکہ کوئی کند ذہن کسی تاویل سے اللہ تعالیٰ کے محبوب مکرم کی رفعت شان کا انکار نہ کر سکے۔ فرمایا: وہ اللہ تعالیٰ کا فرستادہ اور خاتم النبیین ہے۔ اس سراج منیر کے افق وجود پر طلوع ہونے کے بعد چراغوں، ستاروں اور چاند کی روشنی کی ضرورت نہیں رہی۔ اب کوئی نیا نبی نہیں بھیجا جائے گا۔ نیز فرمایا کہ وہ سب صداقتوں کی سچائی کا گواہ ہے۔ اس کا وجود، اس کی صفات، اس کے اقوال، اس کے اعمال، اس کے سارے احوال اللہ تعالیٰ کی طرف دعوت دینے والے ہیں۔ یہ سراج منیر بن کر تشریف لایا ہے۔ پھر فرمایا: میں اور میرے فرشتے سب اس کی ثناگستری کر رہے ہیں، اے ایمان والو! تم بھی میرے محبوب رسول پر، قائد انسانیت پر، اس آفتاب عالمتاب پر درودو سلام بھیجا کرو۔