تعارف سورۃ الشمس

اس کا پہلا کلمہ ’الشمس‘ ہی اس کا نام ہے۔ اس میں ایک رکوع، پندرہ آیتیں، چون کلمات اور دو سو سینتالیس حروف ہیں۔

نزول

یہ باتفاق علماء مکہ میں نازل ہوئی۔

مضامین

متعدد قسمیں اٹھانے کے بعد انسان کو اس حقیقت سے خبردار کیا کہ جس حکیم خالق نے اس کو پیدا فرمایا ہے، اس کو گوناگوں قابلیتیں عطا کی ہیں اور ان کو استعمال میں لانے کے لیے اعضاء سے نوازا ہے۔ اس نے اس کی فطرت میں نیک و بد، خیر و شر میں امتیاز کی تخم ریزی کردی ہے۔ جو شخص اس بیج کی مناسب نگہداشت کرتا ہے۔ اس کی نشوونما پر پوری توجہ دیتا ہے۔ وہ کامیاب و کامران ہے، لیکن جو شخص اپنے لاشعور سے ابھرنے والی آواز کو درخور اعتناء نہیں سمجھتا۔ کسی برائی کے اقدام پر اس کے نہاں خانہ دل میں جو ہلچل برپا ہوتی ہے اس کی پروا نہیں کرتا اور اپنے نفس کی خواہشات کے ریلے میں تنکوں کی طرح بھٹکتا پھرتا ہے۔ قوم ثمود کا تذکرہ تم بار بار سن چکے ہو۔ ان کے نبی نے ان کے مطالبہ کے مطابق معجزہ دکھایا۔ انہوں نے اپنی آنکھوں سے دیکھا کہ چٹان پھٹی اور اس سے ایک جیتی جاگتی اونٹنی نمودار ہوگئی۔ لیکن جن کے دل کی آنکھ اندھی تھی انہیں پھر بھی ہدایت نصیب نہ ہوئی۔ بلکہ ان کے ایک بدبخت ترین انسان نے اس ناقہ کی کونچیں کاٹ کر اللہ کے غضب کو چیلنج کیا۔ خود بھی برباد ہوا اور اپنی ساری قوم کو بھی برباد کر ڈالا۔