تعارف سورۃ الذاریات

اس کا نام الذاریات ہے، جو اس کا پہلا کلمہ ہے۔ اس میں تین رکوع ، ساٹھ آیتیں، تین سو ساٹھ کملے، ایک ہزار دو انتالیس حروف ہیں۔

نزول

باتفاق علماء اس کا نزول مکہ میں ہوا۔

مضامین

عقیدہ قیامت، اسلام کے بنیادی عقائد سے ہے۔ زندگی کا جو پروگرام اسلام پیش کرتا ہے، اس پر صحیح طور پر عمل اسی وقت ہو سکتا ہے، اس کے فیوض و برکات سے انسان اسی وقت متفیض ہو سکتا ہے جب قیامت پر اس کا یقین محکم ہو۔ اس لیے متعدد چیزوں کی قسمیں کھا کر یہ بتایا گیا کہ قیامت کی آمد کا وعدہ سچا ہے اور وہ دن ضرور آئے گا جب نیک و بد کو جزا و سزا ملے گی۔ کفار جو قیامت کا انکار کرتے ہیں۔ ان کے پاس اس انکار کی کوئی معقول وجہ نہیں ہے۔ صرف قیاس آرائیاں ہیں جن کی کوئی حقیقت نہیں اور وہ ان قیاس آرائیوں سے اس لیے مطمئن ہیں کہ وہ عیش و عشرت کے نشہ میں مدہوش ہیں۔ جب موت کا تلخ گھونٹ پئیں گے اس وقت خوفناک حقائق سے ان کی آنکھیں چار ہوں گی۔ مگر اس وقت بجز حسرت و ندامت کچھ حاصل نہ ہوگا۔

پھر بتایا ان کے برعکس کچھ اور لوگ بھی ہیں جو ہر وقت اپنے رب کریم سے لرزاں ترساں رہتے ہیں۔ اس کے ہرارشاد کی تعمیل کرتے ہیں۔ ان کی راتیں اس کے ذکر سے گزرتی ہیں اور سحری کے وقت اپنی کوتاہیوں اور غفلتوں پر مغفرت طلب کرتے رہتے ہیں اور جو مال انہیں اللہ تعالیٰ نے دیا ہے۔ اس میں غریبوں اور محروموں کو دیتے رہتے ہیں۔

دوسرے رکوع میں متقیوں کے سرتاج اور مقبولین کے امام حضرت سیدنا ابراہیم علیہ الصلوۃ و السلام کے حالات بیان فرمائے اور پیرانہ سالی میں انہیں فرزند ارجمند کی ولادت کا مژدہ سنایا۔

اس کے بعد چند ایسی قوموں کا تذکرہ کیا جو فسق و فجور کی زندگی میں سرشار رہیں۔ اپنے نبیوں کی دعوت کو ٹھکراتی رہیں۔ اس سرکشی کی پاداش میں ان کا جو انجام ہوا، وہ سب کے لیے باعث عبرت ہے۔

تیسرے رکوع میں اللہ تعالیٰ کی شان و عظمت بیان کرنے کے بعد بتایا کہ اسی کے دامن کرم میں پناہ لو۔ اس کے ساتھ کسی کو شریک نہ ٹھہراو۔ پہلے بھی لوگوں نے اپنے انبیاء کو ساحر اور مجنوں کہا اور سرکش بنے رہے۔ اسے محبوب اگر یہ کفار آپ کے بارے میں ایسی نازیبا کرتے ہیں تو آپ ان سے رخ موڑ لیں اور نصحیت کرتے رہیں، اہل ایمان اس نصیحیت سے نفح حاصل کریں گے، پھر جن و انس کی تخلیق کی غایت بتا دی کہ وہ اللہ تعالیٰ کی عبادت کریں اور اس کے احکام کی پابندی کریں۔ اللہ تعالیٰ کو ان کو ضرورت نہیں۔ نہ وہ ان سے رزق مانگتا ہے نہ خوراک کا طلبگار ہے بلکہ ساری کائنات اس کے دستر خوان کرم کی ریزہ چین ہے اور جو لوگ اس حقیقت کو نہیں سمجھتے ان کے لیے ہلاکت اور خرابی ہے۔