تعارف سورۃ التحریم

اس سورہ کا نام التحریم ہے جو پہلی آیت کے کلمہ لم تحرم سے ماخوذ ہے۔ اس کی بارہ آیتیں ہیں۔ اس کے کلمات کی تعداد دو سو سینتالیس اور حروف کی تعداد ایک ہزار ساٹھ ہے۔

نزول

یہ مدینہ طیبہ میں نازل ہوئی۔ سال ِ نزول 7ھ یا 8ھ ہے کیونکہ حضرت حاطب (رض) سات ہجری میں حضور نبی کریم صلی اللہ علیہ وآلہ وسلم کا دعوت نامہ لے کر مقوقس والی اسکندریہ کے پاس گئے۔ اس نے ماریہ قبطیہ اور ایک دوسری خاتون سیریں نامی کو بطور ہدیہ حضور کی خدمت میں بھیجا۔ حضور صلی اللہ علیہ وآلہ وسلم نے حضرت ماریہ کو شرف زوجیت بخشا۔ ان کے بطن سے 8ھ کے آخری ماہ میں حضرت ابراہیم تولد ہوئے۔ کیونکہ اس سورہ کا اس واقعہ سے بھی تعلق ہے۔ اس لیے زمانہ نزول 7ھ یا 8ھ ہی بنتا ہے۔

مضامین

1۔ حضور سرور عالم صلی اللہ علیہ وآلہ وسلم نے ایک موقع پر ایک حلال چیز سے اجتناب کرنے کی قسم کھا لی۔ اگر وہ پابندی برقرار رہتی تو حضور کو تکلیف ہوتی۔ نیز امت کے لوگ ایسا کرنے کو سنت نبوی سمجھ لیتے اور اپنے اوپر ناروا پابندیاں عائد کرنے کو اعمال صالحہ میں شمار کرنے لگتے۔ اسی طرح اسلامی معاشرہ رفتہ رفتہ خود پیدا کردہ مشکلات اور محرومیوں کے دلدل میں پھنس کر رہ جاتا۔ اس لیے اللہ تعالیٰ نے حکم دیا کہ قسم کا کفارہ ادا کردیں اور اس پابندی سے رستگاری حاصل کریں۔ آپ کی اور آپ کی امت کی تکلیف اور مشقت رحمت الٰہی کو گوارا نہیں۔

یہاں تحرم سے مراد شروع تحریم نہیں کہ کسی حلال چیز کو انسان حرام اعتقاد کرنے لگے بلکہ کسی چیز کے استعمال سے اجتناب و احتراز مراد ہے تفصیل آیت کے ضمن میں ملاحظہ فرمائیے۔

2۔ ازواج مطہرات کے دلوں میں حضور صلی اللہ علیہ وآلہ وسلم کی جو بے پناہ محبت تھی وہ بعض اوقات رقابت کے جذبہ کو بھڑکا دیتی اور ایسی صورت حال پیدا ہوجاتی جو حضور کے لیے خاصی پریشان کن ہوتی۔ اللہ تعالیٰ نے اس سورہ میں ازواج مطہرات کی تادیب فرمائی کہ وہ آئندہ ایسی کوئی حرکت نہ کریں جو حضور کے خاطر عاطر پر بار ہو۔ خواہ اس کا محرک تمہارا والہانہ جذبۂ محبت ہی کیوں نہ ہو۔ تمہاری محبت کو خود سر نہیں ہونا چاہیے بلکہ رضائے حبیب کا حلقہ بگوش ہونا چاہیے۔ تمہارے جذبات شوق کے تقاضے کچھ ہوں انہیں ہر حال میں میرے نبی کی پسند اور ناپسند کا پابند ہونا چاہیے۔

3۔ ایک زوجہ مکرمہ، مکرمہ افشاء راز کر بیٹھیں، انہیں سرزنش فرما دی۔ اس سے امت کی خواتین کو بھی سبق مل گیا کہ وہ بھی اپنے شوہروں کے رازوں کو محفوظ رکھا کریں، ورنہ ان کی معمولی سی غفلت ان کے لیے، ان کے خاندان کے لیے تباہ کن ثابت ہوسکتی ہے۔

4۔ رسول اللہ صلی اللہ علیہ وآلہ وسلم کی گھروالیوں کی اصلاح کے بعد اب غلامان مصطفیٰ علیہ اطیب والتحیۃ والثناء کو حکم دیا جارہا ہے کہ وہ خود بھی دوزخ کا ایندھن بننے سے بچیں اور اپنے اہل وعیال کی بھی ایسی صحیح تربیت کریں کہ وہ جہنم کے عذاب سے بچ جائیں۔ گویا ماں باپ پر فرض کردیا کہ وہ اپنے بچوں کے اخلاق کی کڑی نگرانی کریں۔

5۔ انسانوں سے گناہوں اور خطاؤں کا صدور ہوتا ہی رہتا ہے، اس لیے ’توبۃً نصوحا‘ یعنی خالص توبہ کرنے کی تلقین فرمائی تاکہ ہمارا دامن عمل ان بدنما داغوں سے پاک ہوجائے۔

6۔ آخر میں دو مثالیں ذکر فرمائیں، ایک کفار کے لیے اور ایک اہل ایمان کے لیے، تاکہ دونوں گروہوں کو اپنی حیثیت کا پورا علم ہوجائے، وہ کسی غلط فہمی مبتلا نہ رہیں۔ ایمان اور محبت الٰہی کمزور سے کمزور انسان کو کس طرح ناقابل تسخیر بنادیتی ہے اس کو ذہن نشین کرانے کے لیے حضرت آسیہ کا تذکرہ فرمایا۔ حضرت مریم علیہا السلام کا پاکدامنی کا ذکر کر کے مسلم خواتین کو ترغیب دلائی کہ وہ بھی اپنے گوہر عصمت کی حفاظت کریں۔ اسے کسی قیمت پر بےآب نہ ہونے دیں۔ ہوسکتا ہے کہ اللہ تعالیٰ اپنے لطف وکرم سے انہیں بھی کسی نیک بخت اور نامور فرزند کی ماں بننے کا شرف بخش دے۔