تعارف سورۃ الاحقاف

آیت 12 میں الاحقاف کا کلمہ مذکور ہے۔ یہی اس سورہ مبارکہ کا نام ہے۔ اس سورت میں چار رکوع اور پینتیس آیتیں ہیں۔ اس کے کلمات کی تعداد چھ سو چوالیس اور حروف کی تعداد دو ہزار پانچ سو پچانوے ہے۔

زمانہ نزول

یہ سورت ہجرت سے کچھ عرصہ پہلے مکہ مکرمہ میں نازل ہوئی۔ اس کی آخری آیت ’فَاصْبِرْ كَمَا صَبَرَ أُوْلُوا الْعَزْمِ مِنَ الرُّسُلِ‘ (اے حبیب! آپ یوں صبر فرمائیے جس طرح اولوالعزم رسولوں کا شیوہ تھا) کے کلمات صاف بتا رہے ہیں کہ یہ مکی زندگی کے اس دور میں نازل ہوئی جب کفار کے ظلم وتشدد کی انتہا ہو گئی تھی۔ وہ اسلام کی روز افزوں ترقی کو دیکھ کر غضب ناک ہو رہے تھے۔ وہ ہر قیمت پر اس شمع کو بجھا دینا چاہتے تھے۔ قرابت، رشتہ داری، ہمسائیگی کے سارے رشتوں کو پاؤں تلے روند چکے تھے۔ ہم وطن اور ہم قوم ہونے کا بھی کوئی پاس نہ رہا تھا، حتی کہ انہوں نے مکہ کے تمام کافر قبائل کو جمع کر کے بنو ہاشم اور مسلمانوں سے معاشرتی قطع تعلق (سوشول بائیکاٹ) کا تحریری معاہدہ کیا تھا اور اس کو ایک صندوقچی میں بند کر کے بڑی حفاظت سے کعبہ میں رکھ دیا تھا۔ اس معاہدے میں یہ تحریر کیا گیا کہ سارے قبائل بنو ہاشم سے لین دین، شادی بیاہ کا سلسلہ کلیۃ بند کر دیں گے۔ کھانے پینے کی اشیا بھی انہیں فروخت نہیں کریں گے۔ تین سال تک حضور (صلی اللہ علیہ وآلہ وسلم) اپنے خاندان اور اپنے جاں نثاروں کے ہمراہ شعب ابی طالب میں محصور رہے۔ الغرض کفار نے اذیت رسانی کی حد کر دی۔ مکی زندگی کے یہ آخری سال تھے جب اس سورہ کریمہ کا نزول ہوا۔

اس صورت میں جنات کی حاضری کا بھی ذکر ہے۔ جنات نے متعدد بار شرف باریابی حاصل کی۔ جس حاضری کا ان آیات میں ذکر ہے، اس کے بارے میں متعدد اقوال ہیں۔ بعض کا خیال ہے کہ یہ واقعہ اس وقت پیش آیا جب حضور (صلی اللہ علیہ وآلہ وسلم) سوق عکاظ سے واپس تشریف لا رہے تھے۔ حضور (صلی اللہ علیہ وآلہ وسلم) کے ہمراہ چند صحابہ بھی تھے اور صبح کی نماز ادا کی جا رہی تھی۔ حضرت ابن عبا س رضی اللہ عنہ، سعید بن جبیر رضی اللہ، مجاہد اور دیگر اکابر کا خیال یہ ہے کہ جب حضور (صلی اللہ علیہ وآلہ وسلم) طائف سے واپس تشریف لا رہے تھے، اس وتق جنات نے حاضری دی۔ اس قول کے مطابق سورت کا زمانہ نزول نبوت کا دسواں سال یا گیا رہویں سال کا آغاز ہوگا، کیونکہ دسویں سال میں جناب ابوطالب کی وفات ہوئی۔ ایک ماہ بعد ام المومنین حضرت خدیجۃ الکبریٰ رضی اللہ تعالیٰ عنہا انتقال فرماگئیں۔ حضور (صلی اللہ علیہ وآلہ وسلم) کے قلب نازک کو سخت صدمہ پہنچا۔ اس سال کو حضور (صلی اللہ علیہ وآلہ وسلم) نے عام الحزن (یعنی رنج واندوہ کا سال) فرمایا۔ کفار کے جو روستم میں ہوشربا اضافہ ہو گیا۔ ان روح فرسا حالات میں حضور (صلی اللہ علیہ وآلہ وسلم) نے طائف کا رخ کیا کہ شاید بنی ثقیف کے سردار اس دعوت کو قبول کرنے پر آمادہ ہو جائیں، لیکن انہوں نے انتہائی شقاوت کا مظاہرہ کیا۔ وہ تین بھائی تھے۔ عبد یا لیل، مسعود، حبیب، قریش کی ایک خاتون بھی ان کے ہاں بیاہی ہوئی تھی۔ حضور (صلی اللہ علیہ وآلہ وسلم) نے ان کو ایمان لانے کی دعوت دی۔ ان میں سے ایک صاحب کہنے لگے: اگر آپ کو اللہ تعالیٰ نے رسول بنا کر بھیجا ہو، تو میں غلاف کعبہ نوچ کر پھینک دوں گا۔ دوسرے بولے: کیا خدا کو آپ کے سوا رسول بنانے کے لئے کوئی دوسرا نہ ملا؟ تیسرے بھائی نے یوں اظہار خیال کیا: بخدا میں آپ سے ہرگز بات نہیں کروں گا، کیونکہ اگر آپ اللہ کے رسول ہیں، تو آپ کی شان اتنی اونچی ہے کہ میری مجال نہیں کہ میں آپ کی بات کا جواب دوں اور اگر آپ خود ساختہ رسول ہیں، تو پھر آپ اس قابل نہیں کہ آپ سے گفتگو کی جائے۔

حضور علیہ الصلوٰۃ والسلام جب واپس جانے لگے، تو انہوں نے شہر کے لفنگوں اور اوباشوں کو پیچھے لگا دیا۔ وہ طرح طرح کی آوازے کستے، گستاخیاں کرتے اور پتھر مارتے پیچھے ہو لئے۔ حضور (صلی اللہ علیہ وآلہ وسلم) کی پنڈلیاں زخموں سے لہولہان ہو گئیں، جوتیاں خون پاک سے بھر گئیں، ایسی حالت میں طائف سے باہر تشریف لائے۔ قریب ہی ربیعہ کے بیٹوں عتبہ اور شیبہ کا ایک باغ تھا۔ حضور صلی اللہ علیہ وہاں سستانے کے لئے ٹھہرے اور اپنے دل درد مند کی فریاد اپنے کریم اور قدیر رب کی بارگاہ میں بایں الفاظ پیش کی:

’الٰہی ! اپنی کمزوری، اپنی بےبسی اور لوگوں کے نزدیک اپنی بےمائیگی کا شکوہ میں تیری جناب میں کرتا ہوں۔ اے ارحم الراحمین! کمزوروں کا تو ہی آسرا ہے اور میرا رب تو ہی ہے۔ تو مجھے کس کے سپرد کر رہا ہے؟ ایسے بندے کی طرف جو ترش روئی سے مجھ سے باتیں کرتا ہے۔ کیا کسی دشمن کو تو نے میرے کام کا مالک بنا دیا ہے اور مجھ پر تیری ناراضگی نہ ہو تو مجھے (ان آلام ومصائب) کی ذرا پروا نہیں، لیکن تیرا دامن عافیت میرے لئے بہت وسیع ہے۔ میں تیرے روئے پاک کے نور کی پناہ مانگتا ہوں اس بات سے کہ تیرا غضب مجھ پر نازل ہو یا تیری ناراضگی مجھ پر اترے۔‘

’لک العتبی حتی ترضی لا حول ولا قوة الا بالله‘ عتبہ اور شیبہ نے حضور (صلی اللہ علیہ وآلہ وسلم) کو اس حالت میں دیکھا تو ان کا دل پسیج گیا۔ انہوں نے اپنے غلام عداس کو بلایا اور کہا کہ انگوروں کا ایک گچھا لے لو، اس کو ایک طشتری میں رکھو اور اس کے پاس لے جاؤ۔ جب عداس نے وہ طبق حضور (صلی اللہ علیہ وآلہ وسلم) کی خدمت میں پیش کیا، تو حضور (صلی اللہ علیہ وآلہ وسلم) نے بسم اللہ کہا اور کھانا شروع کیا۔ عداس نے تعجب سے حضور (صلی اللہ علیہ وآلہ وسلم) کی طرف دیکھا اور کہا کہ اس علاقہ کے لوگ تو کھانے سے پہلے اللہ تعالیٰ کا نام نہیں لیا کرتے۔ حضور (صلی اللہ علیہ وآلہ وسلم) نے پوچھا تم کس علاقہ کے رہنے والے ہو اور تمہارا دین کیا ہے؟ کہنے لگا میں نصرانی ہوں اور نینویٰ کا رہنے والا ہوں۔ حضور (صلی اللہ علیہ وآلہ وسلم) نے پوچھا کیا تم مرد پاک یونس بن متی کے شہر کے رہنے والے ہو۔ عداس کہنے لگا آپ کو یونس کا کیسے علم ہے؟ فرمایا وہ تو میرے بھائی ہیں۔ وہ بھی نبی تھے اور میں بھی نبی ہوں۔ عداس نے جھک کر حضور (صلی اللہ علیہ وآلہ وسلم) کے سرمبارک کو بوسہ دیا اور دونوں ہاتھوں اور پاؤں کو چوم لیا۔ واپس گیا، تو عتبہ اور شیبہ نے پوچھا تم نے ان کی قدمبوسی کیوں کی۔ کہنے لگا اس وقت روئے زمین پر ان سے بہتر کوئی شخص نہیں۔ انہوں نے مجھے ایک ایسی بات بتائی ہے جو نبی کے بغیر کوئی نہیں بتا سکتا۔

وہاں سے روانہ ہو کر حضور (صلی اللہ علیہ وآلہ وسلم) وادی نخلہ میں پہنچے۔ وہاں شب باش ہوئے۔ صبح کی نماز میں حضور (صلی اللہ علیہ وآلہ وسلم) تلاوت فرما رہے تھے کہ نصیبین کے جنات کا ایک گروہ وہاں سے گزرا۔ نبی کریم (صلی اللہ علیہ وآلہ وسلم) کی تلاوت سنی تو سب وہیں جم کر کھڑے ہو گئے اور اللہ تعالیٰ کے پاک کلام کو اس کے نبی کی پاک زبان سے سننے میں محو ہوگئے۔ جب اپنی قوم میں واپس گئے تو قرآنی تعلیمات سے انہیں بھی آگاہ کیا۔

مضامین

جیسے مندرجہ بالاسطور سے واضح ہوا کہ یہ سورت نبوت کے دسویں سال کے آخر یا گیا رہویں سال کے آغاز میں مکہ میں نازل ہوئی، اس لئے اس میں ان کی اصلاح کی طرف پوری توجہ دی گئی ہے۔ ان کے معبودان باطل کی بےبسی اور بیکسی کا پردہ چاک کر کے اللہ تعالیٰ کی وحدانیت پر استدلال کیا گیا ہے۔ قیامت کے بارے میں وہ جن شبہات میں بری طرح الجھے ہوئے تھے، ان سے نکلنے کا انہیں راستہ بتایا گیا ہے۔ اس کے ساتھ ساتھ ان کے بیمار اذہان جس خود ستائی اور خود فریبی کے مرض کا شکار تھے، اس کو عیاں کیا گیا ہے۔

عوام الناس اسلام کی سچی تعلیمات سے متاثر ہو کر اور سرور عالم (صلی اللہ علیہ وآلہ وسلم) کی پاکیزہ سیرت وصورت سے مسحور ہو کر اسلام کی طرف راغب ہونے لگتے تو یہ لوگ ان سادہ منش عوام کو یہ کہہ کر اسلام سے برگشتہ کر دیتے کہ اے لوگو! ہمیں دیکھو، اس بھرے شہر میں، اس سارے علاقہ میں، علم وفہم میں ہمارے پائے کا کوئی دوسرا آدمی ہے ؟ کوئی ایسا شخص ہے جسے احوال عالم کا تجربہ ہم سے زیادہ ہو؟ تمہارا مشاہدہ ہے کہ جنگ اور صلح ہر حالت میں ہماری رائے ہی صائب اور درست ہوتی ہے۔ مزید برآں ہماری قسمت کا ستارہ بڑی بلندی پر ہے۔ اپنے بخت کی ارجمندی کے باعث ہر اچھی بات کی طرف ہم سب لوگوں پر سبقت لے جاتے ہیں۔ اگر اسلام کوئی اچھا دین ہوتا تو بایں علم وفہم، تجربہ اور فراست کیا اس کو قبول کرنے میں ہم پیچھے رہ جاتے اور یہ بھاڑ جھونکنے والے اس معاملے میں ہم سے سبقت لے جاتے۔ یہ کیونکر ممکن تھا، اس لئے ہمارا اس دین کو قبول نہ کرنا اس بات کے لئے کافی سند ہے کہ یہ دین کسی مصرف کا نہیں، بیکار محض ہے۔

یہ ان کی ابلہ فریبی تھی جس میں وہ عمر بھر مبتلا رہے۔ خود بھی اسلام کے سرچشمۂ شیریں سے فیض یاب نہ ہوئے اور جہاں تک بن پڑا، عوام کو بھی اس سے دور رکھتے رہے۔

اسلام کی پاکیزہ تعلیمات جس روح پرور انقلاب سے اپنے ماننے والوں کو ہمکنار کر دیتی ہے، اس کی وضاحت دو آدمیوں کے خیالات کا تذکرہ کر کے فرما دی۔ ایک مومن اور دوسرا کافر۔

آیت نمبر 15 کے آخر میں جو دعا ہے اس کے آئینہ میں بندہ مومن کی آرزوؤں اور تمناؤں کا عکس جمیل آپ کو نظر آئے گا اور آیت نمبر 17 میں ایک کافر کی کج خلقی، کج فہمی کی تصویر صاف صاف دکھائی دے رہی ہے۔

اہل مکہ کو قوم عاد کے انجام سے عبرت حاصل کرنے کی دعوت دی گئی ہے۔ ان کی بربادی کی وجہ بتاتے ہوئے فرمایا کہ اللہ تعالیٰ نے انہیں بڑی قوت وطاقت عطا فرمائی تھی۔ انہیں ظاہری اور باطنی صلاحیتیں مرحمت کی تھیں۔ وہ اگر چاہتے تو اپنے پروردگار کی نعمتوں کا شکر ادا کرتے اور مزید انعامات واحسانات کے مستحق بن جاتے، لیکن آیات الٰہی سے بےاعتنائی، بلکہ ان کا استہزا اور انبیاء کی تکذیب کی عادت نے انہیں برباد کر کے رکھ دیا۔ پھر نہ مال ودولت ان کو ہمارے عذاب سے بچا سکی، نہ علم دفن میں ان کا کمال ومہارت ان کے کسی کام آئی۔ اپنی بدکاریوں کے باعث وہ حرف غلط کی طرح نیست ونابود کر دئیے گئے۔

کفا رومشرکین کی طرف سے جب حددرجہ عناد وعداوت کا اظہار کیا جانے لگا، وہ مسلمانوں کو اذیت پہنچانے میں کوئی دقیقہ فروگزاشت نہ کرتے، خود ذات پاک حبیب کبریا علیہ التحیۃ والثنا کو بھی جی بھر کر ستاتے، تو ان کی بربریت کا مقابلہ کرنے کے لئے اللہ تعالیٰ نے اپنے حبیب کو صبر کی ڈھال استعمال اللہ تعالیٰ نے اپنے حبیب کو صبر کی ڈھال استعمال کرنے کا حکم دیا۔ ارشاد فرمایا فاصبر کما صبرا اولوا العزم من الرسل۔ بےشک اہل حق کے لئے ہمیشہ سے صبر ہی ایک ایسا ہتھیار ہے جس سے وہ دشمن کے مکروفریب کا بھی مقابلہ کرتے ہیں اور اسی سے مسلح ہو کر دشمنان حق کے جدید ترین مہلک جنگی اسلحہ کو بھی ناکارہ کر کے رکھ دیتے ہیں۔ ہمارے آقا علیہ الصلوٰۃ والسلام نے بھی اسی ہتھیار سے باطل کو شکست دی اور حق کا پرچم بلند کیا اور ہم غلاموں کے لئے بھی کامیابی اور فلاح کا یہی طریقہ ہے۔