تعارف سورۃ الدھر

اس کو ’سورۂ دہر‘ اور ’سورۂ الانسان‘ کے ناموں سے موسوم کیا جاتا ہے۔ اس کے اور نام بھی ہیں لیکن وہ زیادہ مشہور نہیں۔ یہ دو رکوعوں، اکتیس آیتیں، دو صد چالیس کلموں میں اور ایک ہزار چون حروف پر مشتمل ہے۔

نزول

اس کے متعلق علماء میں شدید اختلاف ہے، بحر المحیط میں ہے کہ یہ جمہور کے نزدیک مکہ مکرمہ میں نازل ہوئی، مجاہد اور قتادہ کہتے ہیں کہ یہ مدنی ہے۔ حضرت حسن بصری، عکرمہ اور قلبی کی رائے ہے کہ یہ سورت مدنی ہے، سوائے آیت 24 کے کہ مکی ہے۔ (روح المعانی)

مضامین

انسان جو آج اپنے بازو کی قوت، سازوسامان اور مال ودولت پر نازاں ہے اور اپنے خالق کو بھول چکا ہے اسے بتایا جارہا ہے کہ تو ہمیشہ سے ایسا نہ تھا بلکہ تجھے نیست سے ہست کیا گیا ہے اور تمہیں ہوش وگوش کی جو قوتیں عطا کی گئی ہیں ان کا مقصد تمہاری آزمائش ہے کہ کیا تم اللہ کے شکر گزار بندوں پر کیے جائیں گے۔

وہ دور خود بینی اور خود غرضی کا دور تھا۔ دوسروں کی خستہ حالی کو دیکھ کر رحمت وشفقت کے بجائے نفرت وحقارت کے جذبات امڈ آیا کرتے تھے۔ ایسے زمانے میں ان لوگوں کی توصیف فرمائی جارہی ہے جو مسکینوں، یتیموں اور اسیروں کو محض اللہ کی رضا کے لیے کھانا کھلایا کرتے تھے۔ پھر ان نوازشات کا ذکر فرمایا جن سے ایسے لوگوں کو نوازاجائے گا۔ آخری رکوع میں پھر اپنے محبوب کو بتادیا کہ یہ کتاب مقدس ہم نے آپ پر نازل فرمائی ہے۔ اس کی تبلیغ میں جو تکلیف آئے، اس پر صبر کیجیے اور ہر وقت اللہ تعالیٰ کے ذکر میں مشغول رہیے تاکہ روحانی قوتیں نشوونما پائیں اور حوصلے بلند رہیں۔

اس کے بعد دنیا پرستوں کے حالات بیان کیے اور ان کی کوتاہ نظری پر انہیں تنبیہ کی کہ وہ فانی زندگی کی لذتوں میں مگن رہے اور آخرت کی ابدی راحتوں کو انہوں نے پس پشت ڈال دیا ہے۔ آخر میں بتایا کہ یہ کتاب پند و موعظمت ہے۔ اب جس کی مرضی ہے، وہ اس کی نصیحتوں پر عمل کرے۔